Latest News

Chanchin thar thenkhat :

Hri leng dona hmanrua hlan

Blockchain Charity Foundation, USA; BCCI, India leh Taipei Economic & Cultural Center, New Delhi atangin COVID-19 hri vei te enkawlna tur hmanrua hrang hrang chu nimin khan Chief Minister, Zoramthanga hnenah hlan a ni a. Nimin a bungraw hlan te hi Ventilator 10, Oxygen Concentrator 100, KN 95 Masks 9600 leh Surgical Mask 50,000 te a ni a, Chief Minister chuan heng tanpuina dawn chungah hian lawmthu sawiin, damlo te enkawl nan tangkai taka hman ngei a nih tur thu a sawi. Hrileng avanga damlo enkawlna Mizoramin a mamawhte Chief Minister chuan heng pawl te hnenah hian lo thlen tawhin, India Formosa Foundation (IFF) chuan a bawhzui a ni.


RD Minister lawmthu hrilh

All Mizoram DRDA Employees Association (AMDEA) hruaitute chuan nimin khan RD Minister, Lalruatkima chu a Pisa-ah hmuin Mizo-ram sawrkar hnuaia kum 2008 hma lama DRDA hnathawktu lakte, Rural Department hnuaia sengluh leh dahngheh an lo nih tak avanga an harsatna sutkian a ni ta chu lawmawm an tih thu an hrilh. AMDEA atanga thawktu nghet atana lakluh te hi an vaiin mi 84 an ni a, an zingah hian Gazetted post 25 telin, Post dang 13, AE-7 leh JE-6 te pawh tihfel thuai tura beisei a ni.


Sericulture Minister zin mek

Sericulture Department changtu Minister Dr. K. Beichhua chu Sawrkar hmalakna hrang hrang atana Ministry hrang hrang dawr turin Delhi-ah a zin mek a, a hmalakna hmasa atan Mizo-ram-a Sericulture tharchhuah nasa taka a pun theihnana hmalak a nih theih nan CMD Fabolous Silk, Prince Solanki leh Scientist dang te meeting a neihpui a. He Meeting-ah hian thu pawimawh hrang hrang bakah Mizoram sawrkar-a Sericulture Department leh Fabolous Silk ten Joint Venture a hma an lak theih dan tur te sawiho a ni. He Meeting hi tun thla ni 18 khan Mizoram House, Chanakyapuri-ah neih a ni.


Tihsual palh chang ran ah puh

MNF Party chuan nimin khan thuchhuah siamin MPCC Media Department ten Village/Local Level Task Force Member thenkhat, COVID-19 kai palh, ZMC-a enkawlte chuan a thlawna enkawlna an dawng thei lova, bill engkim chawitir vek an ni tih an sawi chu thu belhchian dawllo a ni tih an tarlang a. Hri kai tam tak enkawl mek zingah tihsual palh a awm thei tih sawiin, chutiang lo chang ran ah chuan puhin, sim deuh tawh tura an duh thu an sawi bawk.


Notification sawifiah

Mizoram Legislative Assembly-a Commissioner, H. Lalrinawma chuan Assembly Constituency seat ruak a lo awmin a hma thei ang bera Notification tihchhuah chu Dan in a sawi anga Assembly Secretariat-in a lo kalpui thin a ni tih sawiin, August 17, 2019-a Tuirial bialtu MLA a boral avanga a tuka Seat ruak a awm thu Notification tihchhuah pawh tihdan phung reng a nih thu a sawi bawk.

Comments

Chhiar Hlawhte