Mizoram sawrkar buatsaihin Tokyo Olympic 2020-a tel Lalremsiami chawimawina neih a ni

Mizoram sawrkar buatsaihin Tokyo Olympic 2020-a tel Lalremsiami chawimawina hun chu Aizawl Vanapa Hall-ah buatsaih a ni.

Mizo Olympian Hockey Player Lalremsiami puala hun buatsaih ah hian Chief Minister Zoramthanga chuan Mizoram in Olympian a nei belh ta chu ropui a tih thu sawiin, Lalremsiami chu a lawmpui thu a sawi a. Infiammna discipline hrang hranga hmasawnna siam tura sawrkarin hma a laknaah a ruhrel, infrastructure chu thil pawimawh tak a nih avangin Hockey tihhmasawna zel tur chuan Hockey Field neih tam a pawimawh thu a sawi a. Tuna Lalremsiami hlawhtlinna hian Hockey a tui tharna leh hmasawnna thalaiah a thlen ngei a rin thu sawiin, Aizawl-ah Hockey Ground tha nei tura hma lak a nih tur thu a sawi bawk.

Mizoram sawrkar in Lelremsiami chu Olympic a tel tura thlan a nih avanga lawmpuina leh amah tihphurna tur atan cheng nuai 25 pek nise tia a lo rel tawh chu Games tan hma khan cheng nuai 10 pek niin nimin khan cheng nuai 15 chu Chief Minister chuan a hlan leh bawk a ni.

He hunah hian Lalremsiami chuan sawrkar, pawl leh mipui ten an lawmpuina chungah lawmthu sawiin, amah chawimawina hun buatsaih chuan a kal zelna turah phurna nasa tak a pek thu a sawi a. Tun hi a tawpna tur a nih loh a beisei thu sawiin, amah lawmpuina thilpek hrang hrang chungah lawmthu a sawi bawk. Lalremsiami hian Hockey a khelh tan dan te, Academy a luta India Team a tel dan leh Olympic Games a tel thei tura a kalkawngte sawiin, a thalai puite chu thil engkimah Pathian rawn chunga hma la thin turin a chah a. A bik takin infiammi te tan phei chuan mahni hriselna ngaipawimawh a, zuk leh hmuam laka fihlim a pawimawh thu te a sawi a. Chief Minister hnenah Chief Minister's Relief Fund atan sum a hlan bakah Hockey Mizoram hnenah tanpuina sumfai a pe bawk.

Chief Secretary Lalnunmawia Chuaungo kaihhruai he hunah hian Deputy Chief Minister Tawnluia chuan Lalremsiami hnenah hian Chief Coach atana ruatna Appointment Letter hlanin, P&E Minister R. Lalzirliana chuan sawrkar in Kolasib-a Inhmun a pek chu a hlan a. Lalremsiami Olympic zin kawng documentary tawi pawh he hunah hian thlirho a ni bawk.