State Level Skill Competition hawnna neih a ni

Department of Labour, Employment, Skill Development & Entrepreneurship hmalakna in World Skill Competition, 2022, Shanghai, China-a tel thei tur thlanna, State Level Skill Competition hawnna chu nimin khan neih a ni.

State Level Skill Competition hi Labour, Employment, Skill Development & Entrepreneurship-a Secretary, Lalramsanga Sailo IRS chuan Aizawl-a ITI Auditorium-ah hawngin ram hmasawnna chu ram leilung hausakna ah leh hmanraw neih ah a innghat vek lova, a ram mite taimakna, themthiamna, leh tumruhna ah a inghat thui hle a ni, a ti a. Thalai tam zawkin hna an neiha an intodelh theihna tur kawng chu Skill Development-ah hian a awm a, hemi kawngah hian rilru leh taksa zawng zawng nena beih a ngai a ni, tiin Skill Competition-a tel turte duhsakna a hlan a ni.

He hunah hian Lalmuanawma, Dy. Director, LESDE chuan State Skill Competition chungchang leh a kalpui anih dan sawifiahin State Level Skill Competition hi ni 31.8.2021, zing dar 9:00 atanga neih tan tur a ni a, Trade hrang hrang 12 hmangin inelna hi kalpui a ni ang. He intihsiaknaa tel thei chin hi National Skill Development Corporation-in kum bithliahin, tehfung tur hrang hrang (judging criteria) pawh Ministry of Skill Development & Entrepreneurship-in World Skills Occupational Standards hmangin a rawn duang sa vek a. Intihsiaknaa tel thei tur mi 59 inziaklut an awm a ni.

State Level Skill Competition-ah hian trade tin atanga titha pahnih thlanchhuah an ni ang a, heng thlanchhuahte hian Regional Skill Competition-ah Mizoram ai an awh dawn a, Regional Skill Competition paltlangte hi National Level intihsiakna ah an inlan leh anga. Chumi paltlang lehte chu India aiawhin World Skill Competition, Shanghai, China-ah an tel dawn a ni.