Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Mizoram-a hri kai enkawllai 5817 awm mek

Mizoram-ah COVID-19 hri kai enkawllai an tlahniam hret hret a, nimin tlai dar 5:00 thleng khan hri kai enkawllai mi 5817 an awm mek a ni.

Inrinni khan Mizoram-ah Sample 9645 enfiah niin heng atang hian COVID-19 hri kai mi 576 hmuhchhuah an ni a, Sample enfiah te atanga zaa 5.97 te chuan hri an kai a. ZMC-a RT-PCR Laboratory-ah Sample 982 enfiah niin heng atang hian hri kai mi 175 hmuhchhuah an ni a, an vai hian Aizawl District-a Sample lak vek niin Tinghmun khua ah hri kai mi 71 zet hmuhchhuah an ni a, a bak hi Veng leh khua 33 ami niin BSF leh CRPF atangin hri kai mi 2 ve ve hmuh an ni bawk. Hei bakah hian Aizawl District-ah Fluorescent Immunoassay (FIA) Test hmangin Sample 5 enfiah ni bawkin hri kai mi pakhat hmuhchhuah an ni bawk.

District hrang hranga TrueNat Laboratory 10-ah Inrinni khan Sample 362 enfiah ni bawkin heng atang hian hri kai mi 34 hmuhchhuah an ni bawk a, an zinga mi 13 te chu Mamit District ami niin Lawngtlai District-ah 9, Siaha District-ah 6 leh Lawngtlai leh Hnahthial District-ah hri kai mi 3 ve ve hmuh an ni bawk.

Inrinni khan Rapid Antigen Test hmangin Mizoram-ah Sample 8296 enfiah ni bawkin heng atang hian hri kai 366 hmuh an ni bawk a, an zinga 124 te chu Aizawl District ami te niin Veng mal-a hri kai hmuh tamna ber Bawngkawn-ah hri kai mi 10 hmuh niin midang hi Veng leh khua 41 ami an ni bawk. Kolasib District-ah hri kai mi 71 hmuh niin a tam zawk hi Kolasib khawpui chhung ami an ni a, Mamit District-ah hri kai mi 44 hmuh niin an zinga 28 chu Pukzing khua ami an ni a, Siaha District-ah hri kai mi 34 hmuh niin Lawngtlai District-ah 30, Lunglei District-ah 23, Champhai District-ah 19, Hnahthial District-ah 14, Saitual District-ah 6 leh Serchhip District-ah hri kai mi pakhat hmuh an ni bawk.

Nimin khan Mizoram-a COVID-19 hri kai mi 749 te anmahni enkawlna hmun atanga chhuahtir an ni ve leh a, heti hian nimin tlai dar 5:00 thlenga Mizoram-a hri kai hmuhchhuah tawh chu 52,180 niin an zinga 46,167 te chu enkawl dam an ni tawh a. Hei hi hri kai hmuhchhuah atangin zaa 88.48 niin hri kai enkawllai 5817 an la awm mek a ni.

Mizoram-a hri kai zinga mi 197 an boral tawh :

Mizoram-a COVID-19 hri kai zingah nimin thleng khan mi 197 an boral tawh. Inrinni zan dar 8:50 khan Badrul Khanam (73), Lunglei chu COVID-19 vangin ZMC-aha boral a, hemi hnu zan dar 10:10 khan Lalngaihawma (61), Tuikual North chu ZMC-ah boralin nimin zing dar 5:40 khan Lalhmasaa@Lala (65), Tinghmun chu Tinghmun 4C-ah a boral leh a. nimin chawhnu dar 2:45 khan Thangthluaii (83) Zemabawk chu ZMC-ah boralin nizan dar 6:20 khan Thangruala (92), Bawngkawn South chu ZMC-ah a boral ve leh bawk a ni.

Comments

Chhiar Hlawhte