Sanghal ruang enfiah niin ASF vanga thi nia rin a ni

Tunhnai khan Serchhip bul Mat ral-a Lungbu lui (Zuangleng ram ep)-ah Sanghal thi hmuh niin heng te hi Inrinni khan enfiah niin African Swine Fever (ASF) vanga thi nia rin an ni.

Thudawn danin Serchhip Vengchung-a cheng mi thenkhat te chuan Lungbu lui-ah hian Aiawt chiahin Aug. 14-a an kal-a engmah an hmuhloh hnuah Aug. 20, 2021 (Zirtawpni)-a an kal lehin Sanghal thi panga (5) lai an hmu a, thuneitute hnena an hriat-tir hnuah Inrinni khan Thenzawl DFO Office atangin Forester leh Forest Guard bakah Serchhip-a AH&Vety Department atangin Dr. H. Vanlalrawna leh thawktu dangte chuan helai hmun hi panin heng Sanghal thi te hi an enfiah a ni.

Thudawn danin heng Sanghal thi te hi a then chu a thihna a rei deuh tawh avangin a ruh chauh hmuh tur awmin a then erawh ala tawihral lo thung a, AH&Vety Department-a thawktute hian Rapid Antigen Test hmanga Sample an enfiah atangin tunlaia Vawk tam takin an thihpui African Swine Fever (ASF) hri hmuh a ni a, amaherawh chu ASF a ni tih finfiah tura RT-PCR hmanga enfiah leh ala tul avangin Sample tul ang ang te lain hmunpui zawkah enfiah leh tur a ni ang. Heng Sanghal thi te ruang awm ang ang hi lakhawmin damdawi hmanga sawngbawl a nih hnuah phum nghal a ni.

Forest Department hotute chuan tun-hnaiah ASF avangin Vawk tam tak an thi tawh tih sawiin, tuna Sanghal thi pawh hi Bhopal lama la enfiah nawn tur ni mah se ASF hri vanga thi nia rin theih a ni tih an sawi a. Hei vang hian ram-hnuaia ramsa thi te kan lo khawih avang leh a sa te kan lo lak avangin kan ranvulh ah nasa zawkin ASF hi ti darhin harsatna lian zawk kan tawk thei tih an sawi a. Hetiang ramsa thi lo hmu palh te pawhin khawiha a sa lo lak chu a him lo tih sawiin, thuneitute hnenah a rang lama hriattira damdawi nena sawngbawla phum thin tur a nih thu an sawi bawk.