Aizawl District atanga Sample lak 151 te chu phai lamah enfiah a nih hnuah an zinga 115 te atangin COVID-19 hrik thar, Delta (B.1.617.2) Variant hmuh niin hei hi sample thawn zawng zawng atanga 78% a ni.
State Nodal Officer & Official Spokesperson on COVID-19 Dr. Pachuau Lalmalsawma chuan Mizoram-ah COVID-19 hrik chhuak thar a awm leh awm loh finfiah turin COVID-19 positive te Swab sample 151 chu Whole Genome Sequencing turin National Institute of Biomedical Genomics (NIBMG), Kalyani, West Bengal-a an thawn thu leh niminpiah khan result hriat niin Sample 151 an thawn zinga 115-ah COVID-19 hrik thar, Delta (B.1.617.2) variant hmuh a nih thu a sawi a, hei hi sample thawn zawng zawng atanga 78% a ni tih a sawi a. Sample te hi Aizawl District a mi vek an nih thu sawiin, zirchianna neih tawh chinah Aizawl, Lunglei, Kolasib leh Serchhip District-ah COVID-19 hrik thar a awm ngei tih finfiah a ni tawh, a ti a. A vawi 5 nan tunah hian Zoram Medical College-a Microbiology Department chuan sample 500 thawn turin an inbuatsaih mek a, heng sample te hi Aizawl, Lunglei, Kolasib, Champhai leh Serchhip District-a ni an nih thu a sawi bawk.
Whole Genome Sequencing tur hian March thla khan Sample 69 thawn niin Variant thar hmuh a ni lova, April thla ah Sample 217 thawnin Deta Variant 4 hmuh a ni a, June thla ah sample 100 thawn lehin Delta Variant 73, Alpha Variant 1 leh Eta Variant 1 hmuh a ni tawh bawk.
Dr. Pachuau Lalmalsawma chuan sample thawnna hmun National Institute of Biomedical Genomics (NIBMG), Kalyani, West Bengal chu India hmarchhak State 8 in kan intawm avangin Sample Test hian hun a duh rei deuh thin tih a sawi a. COVID-19 hri kan inkaichhawn chak dan leh hri kai ten an tawrh nat sawt dan en hian District tinah he hrik thar hi a awm nia ngaih theih a nih thu leh a finfiah nan hma lak zel a nih thu a sawi a. Mipuite chu fimkhur lehzual tura ngenin, COVID-19 hri laka invenna tura sawrkarin inkaihhruaina a duante chu uluk taka zawm turin a chah nawn leh bawk.
.jpeg)
Comments
Post a Comment