Govt. Serchhip College in Annual College Day an hmang

Govt. Serchhip College chuan nimin khan Annual College Day hmangin kumin a an College zirlai tithate hnenah chawimawina leh lawmpuina hlan an ni.

Govt. Serchhip College Academic Building Room No. 3-a College Annual Day an hman hi Dr. K. Lalhmingsangi, Asst. Professor, Dept. of Botany chuan kaihruaiin kum 2020-2021 chhunga an College zirlai titha te hnenah Award hrang hrang sem a ni a. ‘Principal's Award’ chu Judithi Lalchanpuii, VI Semester, Dept. of Zoology hnenah hlan niin Mizoram University hnuaia Botany Under Graduate Examination 2021-a Mizoram puma 8-na a nih avanga hlan niin, Award hian lawmpuina thuziak bakah pawisafai Rs. 10,000/- a keng tel a ni. Judithi Lalchanpuii hi National NSS Award dawng thei tura chhawpchhuah zingah a tel bawk.

Mizoram College Techers’ Association (MCTA) Award pawh he hunah hian sem niin, he Award hi Govt. Serchhip College-a Department hrang hranga First Division-a pass chin zinga Mark hmu sang ber mi 10 te hnenah pek a ni a, Award hian thuziak leh pawisafai Rs. 1000/- theuh a keng tel a ni.

He hunah hian Student's of the Year Award pawh Career & Counselling Cell hma-laknaa pek niin he Award hi Judithi Lalchanpuii, VI Semester, Dept. of Zoology niin, Trophy, Certificate leh pawisafai Rs. 5000/- hlan a ni a. Ani bakah hian Top 3-a tling pahnih, B. Lal-lawmawmi, Dept. of Geography leh Lalhmingsangi, Dept. of History te hnenah thuziak leh pawisafai hlan an ni bawk. Hei bakah hian Finishing School Essay Writing Competition lawmman semna neih niin K. Lalvensanga, VI Semesterz Dept. of Mizo chuan lawmman hi dawngin thuziak leh pawisafai hlan a ni bawk. Nimin-a he hun hman hi an College Principal, PC. Lalremsiama chuan hmanpuiin zirlaite fuihna thu a sawi bakah zirlaite chu chawimawi tlak nih tum zel turin a chah bawk.