Latest News

Kolasib District-a hri leng do dan sawihona nei

Nimin khan Health Minister Dr. R. Lalthangliana hovin COVID-19 dona kawnga hmalak dan leh hmachhawp chungchang sawihona neih a ni.

Kolasib DC Conference Hall-a thutkhawm hi Kolasib DC Dr. H. Lalthlangliana chuan kaihruaiin Health Minister Dr. R. Lalthangliana chuan Kolasib District-a Sawrkara mawhphurtute, tlawmngai pawl hrang hrangte leh District mipuite chu hri dona kawnga an hmalakna fakawm a tih thu sawiin, Mizoram District dangte hmachhawn ve loh, ramri chungchanga buaina leh State luhkapui nihna anga mikhual chhawntu ni chung pawha hri dona kawnga hmalakna tha tak a kalpui a ni thin chu lawmawm a tih thu a sawi bawk.

Health Minister chuan India hramchhak State zingah COVID-19 hrileng avanga nunna chan khaikhin chuan Mizoram chu dinhmun ziaawm ber kan nih thu sawiin, hei hi sawrkar leh tlawmngai pawl hrang hrangte thawhhona that vang a nih thu a sawi a, 2nd Wave hmachhawn mek ah leh 3rd Wave awm thei lakah pawh tha thlah lova inpuahchah chhunzawm zel turin kalkhawmte a chah bawk.

Kolasib District chhunga hri kai, natna lang chhuakte chu DCHC hmunhma in a daihlo palh a nih pawhin ZMC-a enkawl zung zung an nih theih nan damlo inhlanchhawn dan tur ruahmanna fel tak kalpui tum a nih thu Health Minister chuan sawiin, naupang enkawlna tur bik, a hran a hmun buatsaih a nih theih nan hma la turin District Medical Superintendent a chah bawk a. Khum 100 awm theihna District Hospital sak a nih thuai theihna turin hma lak mek a nih thu tarlangin, Covid-19 Vaccine leh test kit pawh thahnem tak kawl mek a nih thu a sawi bawk.

He hun kaihruaitu Kolasib District Bawrhsap, Dr. H. Lalthlangliana chuan Kolasib District-a hri kai zat sanna chhan thenkhat tarlangin, State pawn atanga Kolasib District chhunga Railways a hnathawk thahnem tak awm te, lo theih lohna avanga ramri-a duty IR Police-te, NGO anga a huhoa inenkawlna hmun atanga inkaidarhna avangte leh State luhkapui Vairengte, Bairabi leh hmun thenkhata endikna kalpui reng vang a nih thu a sawi a. Kolasib DC chuan Vaccine la tur ten an lak ngei theih nan Veng tin VC-te nen tangho Vaccine la la lo dapchhuah dan tur ruahmanna kalpui tum a nih thu a sawi bawk.

He huna tarlan a nih danin Kolasib District chhunga Vaccine la thei te atanga chhutin COVID-19 Vaccine Dose 1-na la tawh 78.64% an ni a, 34.67% ten Second Dose la tawhin Vaccine la la miah lo anga chhinchhiah mi 12,044-te dap chhuah hna hi vengtin leh khawtin a kalpui tum a ni a. Hri kaite enkawl dan leh dinhmun tarlanna ah hri vei chunga hlawhtling taka nau hring 11 an awm tawh thu tarlan a ni bawk.

Comments

Chhiar Hlawhte