Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar thenkhat :

Tourism Minister in kawm

New Delhi-a cham mek Tourism Minister Robert Romawia Royte chuan nizan hmasa khan Union Tourism Minister of State Ajay Bhatt chu a chenna In-ah kawmin Mizoram Tourism Department hmalakna tlangpui a hrilh bakah Tourism Ministry-a Project sanction tura thehluh tawh te rang taka sanction turin a ngen a, Union Minister chuan  tihfel thuai a tum tur thu a lo hrilh a ni. Union Defence Minister of State ni bawk Ajay Bhatt hnenah hian Myanmar leh India inkarah inkungkaihna tha zawk a awm zel theih nan Myanmar ramah Astroturf Football Field te, Indoor Stadium te, School building te, Community Hall te leh Futsal Ground te India sawrkar sum-a siam a tul hle tih a sawi bawk. Tourism Minister hian nimin khan Niti Ayog Adviser Dr Prem Singh IAS pawh a kawm nghal bawk.


DTO Office building hawng

Transport Minister TJ. Lalnuntluanga chuan nimin khan Lawngtlai-ah cheng nuai 228 senga sak District Transport Office building thar a hawng a, he hunah hian Minister chuan Transport Department-a thawktute chuan hna an thawk rim tak zet tih sawiin, thawktu indaihlo viau chung pawhin, thawktu zawng zawngin theihtawp an chhuah thin chu lawmawm a tih thu a sawi. Lawngtlai a DTO Office hi NEDP sum cheng nuai 228 senga sak niin June ni 20, 2016 khan sak tan a ni a, nikum January ni 31 khan sak zawh ni tawh mah se COVID-19 hri leng avangin a hawn hun tura lo ruahman tawh thin chu sawn niin nimin khan hawn a ni ta a, Mizopa chhiara chhawng 3 a ni.


Zirna siamthat sawihona nei

School Education Department Officer-te leh Central YMA Kumpuan Committee hruaitute chuan nimin khan School Education Directorate Conference Hall-ah zirna siamthat chung-chang sawihona an nei a, Zirna siamthat kawngah a theih ang anga tan lak ho zel tha tiin hemi kawnga hmalak ho dan tur hrang hrangte pawh he hunah hian sawiho nghal a ni bawk.


BJP in Oxygen Cylinder hlan

BJP Mizoram Pradesh Champhai District Hqrs. chuan nimin khan Champhai District Hospital-a hman turin Oxygen Cylinder pathum (3) an hlan a, heng Oxygen Cylinder te hi Champhai District BJP President C. Hrangsatkima chuan District Medical Superintendent Zatluanga hnenah a hlan a ni.

Comments

Popular News (Last 30 Days)