Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip District-a Oil Palm chinna hmun zatve vel zet a chhe tawh nia hriat a ni

Serchhip District chhunga Oil Palm chin kawnga hmalakna chu kar kalta khan Godrej Agrovet Ltd. aiawhte chuan rawn tlawhin, hmalak zuina tlak a nih leh nih loh an rawn enfiah a. Serchhip District-a Oil Palm chinna hmun zatve vel zet chu a chhe leh tawh nia hriat a ni.

Godrej Agrovet Ltd. aiawha rawn kal Executive Officer, Lalruatkima leh a thawhpui te hian Serchhip District chhung khaw thenkhata Oil Palm chinna hmun te an tlawh hnuah Inrinni zing khan Serchhip-a tualchhung thuthar thehdarhtu thenkhat te chuan Agriculture Rest House-ah an kawm a, he hunah hian Godrej Agrovet Ltd. hotute chuan kum 2014 atanga Kolasib leh Mamit District-ah te Oil Palm leia hma an lak thu leh tunah chuan Oil Palm Mill te bunin a hriak an her mek thu an sawi a. Theihtawp chhuaha hma an la chungin an khawl bun in hna a thawh theih atanga zaa 30 vel chauh thawh tur an la hmuh thu sawiin, zaa 70 atanga 80 thleng vel tal thawk thei tura hmalakna an kalpui mek thu an sawi a. Oil Palm rah an lei tan atangin cheng vbc. 16 man vel lei tawhin a hriak an her MT 4000 vel an thawnchhuah tawh thu a sawi a. Kuthnathawkture hnen atang Oil Palm leina sum hi Bank Account kaltlangin an pekchhuah thu a sawi a. Serchhip District chhunga hma la thin 3F te an inhnuhdawh tak avangin Oil Palm chingtute dinhmun zirchianga Serchhip hmalakna tlak a ni em tih rawn zirchiang an nih thu an sawi bawk.

Serchhip District Agriculture Officer (DAO), Tlangtimawia Zote kaihhruai he hunah hian Agriculture Department-a thawktute chuan kum 2008 atanga 2016 chhungin Serchhip District-ah Oil Palm chinga hmalak a ni tih sawiin, ram hectare 2000 chuanga zau-a chin a nih hnuah harsatna hrang hrang avangin tunah chuan hectare 751 velah ala awm tih an sawi a. Serchhip District viltu 3F te an inhnuhdawh avangin Oil Palm chinna zatve vel chu a chhia nia an ngaih thu sawiin, amaherawh chu tun thlengin a tharchhuak tawh te chuan harsatna lutuk nei lova an hralh thu an sawi bawk.


Serchhip District chhunga Oil Palm chingtu mi 521 zinga 34 te chuan an tharchhuah ang te an hralh tawh thu leh Godrej Agrovet Ltd. ten an leisak reng thu he hunah hian tarlan a ni a, kum 2015 atanga Sawrkar kum liamta thleng khan Serchhip District atang hian Oil Palm Rs. 25,96,470.50 man leiin kumin hian quintal 600 vel an lei tawh thu sawilan a ni a. Sawrkar hmasa in a phurhna man tur NEDP atanga cheng nuai 15 an dah chu an hman mek thu an sawi a, tunah hian sum pawh hmanban tlem ala awm thu an sawi a  Serchhip District atanga 3F te inhnuh-dawh chhan ber chu khawl bun-a hma la turin an mamawh ang zat hmuh theih an inbeisei lo vanga nia a lan thu an sawi bawk.

He inkawmna ah hian Serchhip District-a Oil Palm kung la awm te chu ala upat loh avang leh a rah that duh hun ala thleng lo nia a lan avangin enkawl zui zel tlak ala nih thu sawilan niin, harsatna lian ber erawh Oil Palm hralhna man a nih thu sawilan a ni a. Oil Palm hmun atanga Company in an leina hmun phurh thlen chu mi tam tak tan harsatna a nih thu leh company in kg. khat Rs. 5.50-a an leina baka sawrkar in Support Price kg. khat ah Rs. 4.50 zel a pek chu pechhuak hma thei se harsatna tam tak sutkian theih a nih a rinawm thu te pawh he hunah hian sawilan a ni a. Oil Palm hmun atanga kawngpui, lirthei lian thlen theihna hmun phurthlen a nih theihna atan Agriculture Department in kuthnathawktute tana Tractor a pekchhuah te pawh hman tangkai theih dan turte pawh sawiho a ni bawk.

Serchhip District-a Oil Palm din-hmun rawn zirchiangtu Godrej Agrovet Ltd. aiawhte hi Serchhip-a Agriculture Department chuan lo mikhualin District chhung hmun hrang hranga Oil Palm chinna hmun te tlawhin Inrinni khan Chhiahtlang lama Oil Palm chinna hmun te an tlawh leh hnuah Kolasib lam an pan a ni.

Comments

Popular News (Last 30 Days)