Latest News

Health Minister leh I&PR Minister ten Aizawl-a COVID-19 Test Kiosk hmun te an tlawh

Health Minister Dr. R. Lalthangliana leh I&PR Minister Lalruatkima te chuan nimin khan Aizawl khawpui chhunga COVID-19 Test Kiosk hmun pathum- Vanapa Hall-a Mega Kiosk; Dinthar Kiosk leh Electric Veng Kiosk te chu tlawhin thawktute hnenah lawmthu an sawi.

Heng hmun an tlawhna ah hian Health Minister Dr. R. Lalthangliana chuan hri leng mekah fimkhur chhunzawm zel a pawimawhzia sawiin, mahni fimkhur thiam a, pawn leh midang bula awm tam loh leh CAB ngai pawimawh hram hram turin mipuite a chah a. Aizawl lun lai taka Mega Kiosk-Vanapa Hall, Tuikual South enkawltu leh thawktute inpekna chu fakawm a tih thu sawiin, anni lo buaipui a, hun leh tha tam tak sengtu- Tuikual South LLTF te chungah lawmthu a sawi bawk a, mipui mamawh tuten tangkai taka an hman tur Sample Booth pathum an hlan (donate) chu fakawm a tih thu a sawi bakah Kohhran hrang hrang, tlawmngai pawl leh mimal bakah department hrang hrang ten sawrkar an thlawpna-ah leh a tul ang chanvo an neih te tlin taka an tih zel avangin lawmthu a sawi bawk.

He hunah hian I&PR Minister Lalruatkima pawhin hripui leng chu mipui tanrualna azarah hneh a nih ngei a rin thu a sawi a, mipui thuawihna te fakawm tiin, VLTF leh LLTF te tana hnawksak leh thuawih lo fal an awm lo niin a lang, a ti a. Hun harsa tak karah thingtlang atangin Aizawl mipuite eitur thlai thar hrang hrang thawn a ni reng te chu lawmawm a tiin, thingtlang loneitute inpekna chu fakawm a ti takzet tih a sawi bawk.

Mega-Kiosk, Vanapa Hall-ah hian Fluorescent Immunoassays (FIA) dah a ni a, test man hi Rs. 300 niin, nitin chawhruala lakin sample 70 lak thin a ni a, FIA hi Accuracy, Specificity, Sensitivity tha tak a ni bawk a. Standard leh Real Mode a hman theih niin Real Mode hian darkar khat chhungin Sample 60 test theih a ni a, Standard Mode hian vawi khatah Sample 15 test theih a ni.

Dinthar Kiosk hi vantlang Kiosk hmasa ber a ni a, tun dinhmunah hian nitin Sample 50 atanga 100 vel lak thin a ni a, Veng thenawm leh a bikin Aizawl West huamchhung-a mipuiten an hmang tangkai hle a. Electric Veng Kiosk hi Community Kiosk, mahni intuamhlawm leh intum awmchhun a ni a, nitin sample 50 vel lak a ni thin a ni bawk.

Comments

Chhiar Hlawhte