Zirtirtu tha chawimawina dawng turin thlang

Kumin (2021)-a rampum huap Zirtirtu chawimawina, 'National Award to Teachers, 2021' dawng turin mi 44 thlanchhuah niin an zingah hian Mizoram atangin Jacinta Vanlalengzami, Headmaster, A&M Grandchild School, North Vanlaiphai (Serchhip District) chu a tel.

Nimin khan sawrkar laipui Ministry of Education, Department of School Education and Literacy chuan National Awards to Teachers, 2021 dawng turte hming hi a tarchhuak a, kumin hian chawimawina dawng tur hian mi 44 thlanchhuah niin an zingah hian Jacinta Vanlalengzami hi telin ani chiah hi Mizoram atanga chawimawina dawng tura thlanchhuah a ni.

Jacinta Vanlalengzami hi A. Denghmingthanga leh Mary M. Kungi, New Serchhip Khawtetlang ami te fa niin June 5, 1975 khan Chawngtlai khua ah a piang a, Primary School atanga Secondary School thleng St, Peter's School, Chhingchhip-ah kalin IGNOU hnuaiah BA zovin D.El.Ed a zo leh bawk a. Kum 1995 khan A&M Grandchild School, North Vanlaiphai-ah hian Zirtirtu hna thawk tanin School Management Board chu a hnathawh danah lungawiin kum 2008 khan Headmaster-ah an dah zui a, Govt. Adhoc Aided School-a hlankai an nih hnuah pawh he hna hi chelhin tun thlengin ala chelh zui ta zel a ni. A thawhna School-ah hian kawng hrang hrangin zirlai leh khawtlang tan hma a la thin a, kum 2010-ah Bharat Scouts and Guides dinin hripui len lai denchhenin Mask 300 zet an State Hqrs. ah a lo thawh tawh bawk a ni.