COVID-19 hri kai mi 600 hmuh belh leh an ni

Mizoram-ah COVID-19 hri kai hmuhchhuah belh an la ni zel a, niminpiah khan Sample 8634 enfiah niin hri kai mi 600 hmuhchhuah an ni a, sample enfiah atanga za zela 6.94 te chuan hri an kai a ni.

ZMC a RT-PCR Laboratory-ah niminpiah khan Sample 1147 enfiah niin heng atang hian hri kai 90 hmuh an ni a, an vai hian Aizawl District-a Sample lak vek niin Veng leh khua 29 ami an ni a, hri kai tawh nen inkawmhnaihna nei deuh vek an ni bawk. Hei bakah hian Fluorescent Immunoassay (FIA) Test hmangin Sample 20 enfiah niin hri kai mi pakhat hmuhchhuah a ni a, Aizawl District-a hri kai hmuhchhuah niin Haulawng khua a ni.

District hrang hranga TrueNat Laboratory-ah Sample 473 enfiah ni bawkin hri kai mi 81 hmuh an ni a, an zinga mi 34 te chu Champhai District ami niin an zinga mi 28 te chu Champhai Electric Veng ami an ni. Lunglei District-ah hri kai mi 19 hmuh niin Lawngtlai District-ah 18, Siaha District-ah 5, Kolasib District-ah 2 leh Mamit, Serchhip leh Hnahthial District-ah hri kai mi pakhat theuh hmuh an ni bawk.

Rapid Antigen Test hmangin niminpiah khan Sample 6994 enfiah niin hri kai 428 hmuh an ni bawk a, an zinga 221 te chu Aizawl District ami niin Bawngkawn-ah mi 26 zet hmuh leh niin midang te hi Veng leh khua 55 ami niin Central Jail a tang zingah hri kai pakhat hmuh leh a ni bawk. Kolasib District-ah hri kai mi 86 hmuh ni bawkin Mamit District-ah 41, Lawngtlai District-ah 31, Lunglei District-ah 30, Serchhip District-ah 8, Champhai District-ah 4, Siaha District-ah 3 leh Saitual leh Hnahthial District-ah mi 2 ve ve hmuh an ni bawk.

Nimin khan Mizoram-a hri kai enkawl mi 971 te chu hri lakah fihlimin anmahni enkawlna hmun atanga chhuahtir an ni a, heti hian nimin tlai dar 5:00 thlenga Mizoram-a hri kai hmuhchhuah chu 49,950 niin an zinga 41,652 te chu enkawl dam an ni tawh a, hei hi hri kai hmuhchhuah atangin zaa 83.39 niin tunah hian hri kai enkawllai 8112 an la awm mek a, hri kai enkawllai hi an tlahniam ve hret hret a ni.

Hri kai zingah mi 186 zet an boal tawh :

Mizoram-a COVID-19 hri kai zingah nimin khan mi pahnih boral lehin nimin tlai thleng khan hri kai mi 186 an boral tawh. Niminpiah ah hri kai boral an awmloh hnuin nimin khan hri mi pahnih an boral ve leh a, nizan hmasa zanlai pelh hnu dar 12:05 khan C. Lalthlamuana (73), Chaltlang Lily Veng chu ZMC-ah COVID-19 vanga boralin nimin chawhnu dar 3:50 khan Lalramchhana Ralte (57), Armed Veng South chu ZMC-ah a boral ve leh bawk a ni. Heti hian nimin thleng khan Mizoram-a hri kai zingah mi 186 an boral tawh a, tun thla bikah mi 38 zet boral tawhin niminpiah, August 17 tihloh ah chuan nitin hri kai boral an la awm ziah a ni.