Latest News

COVID-19 hri kai boral te zingah taksa-a hri kai lanchhuahna neih hnuah Sample Test lawk lo an tam

Mizoram-a COVID-19 hri kai boral zingah a zatve zet chu taksa-a hri kai lanchhuahna an neih veleh a Sample enfiah nghal lo an ni a, hei vang hian mithiam te chuan mipuite chu mahni in chik renga symptom an neih chuan a rang thei ang bera in test nghal turin an duh tih an sawi.

Health Minister Dr. R. Lalthangliana hova COVID-19 hripui lengin Mizoram a nghawng dan thlirhona nimin-a SAD Conference Hall a neih ah Dedicated COVID Hospital-Zoram Medical College (ZMC) hotute chuan ZMC-a COVID-19 hri kai an enkawl dan an sawi a, an zirchianna ah Mizoram-a COVID-19 vanga nunna chan zinga 86.5% hi ZMC-a admit an ni a, nunna chan 174 an zirchian tawhte zinga 125 hi Aizawl khawpui chhunga mi niin, midang 49 hi Aizawl pawn atanga admit an ni a. Nunna chan an zirchian tawh zinga 50% hi symptom an neih veleh a sample test nghal lo niin, kar hnih chuang symptom an neih hnua sample test tir chauhte pawh an awm tih sawiin, mipuite chu mahni in chik renga symptom an neih chuan a rang thei ang bera in test nghal turin an duh tak meuh tih an sawi a ni.

Nunna chan an zirchian tawh zinga 65% hi kum 60 chunglam an ni a, nunna chan zingah vaccine la lo mi 133 awmin Full Dose la tawh mi 21 leh First Dose la mi 30 an awm a, vaccine la chung hian vanduai chuan hri a kai theih a ni tih an sawi a, damlo an enkawlna atanga an tawnhriat atangin vaccine lak hian awmzia a nei hle a ni tih an sawi a ni. Nunna chan zingah insawiselna/damlohna nei lo mi 23 an awm tawh a, an zingah hian kum lama la thalai tak takte pawh an awm a ni. Vawi hnih positive nawn mi pakhat nunna chan a awm tawh bawk a. Natna benvawn nei nunna chan zingah Zunthlum vei, Thisen sang, Thawhah/Asthma, Cancer, TB, Thin tha lo leh Kal tha lo an tam bik tih sawiin, mitinin mahni taksa uluk a, insawizawi fo a pawimawh tih hre thar leh se an duh thu an sawi bawk.

June leh July thla khan ZMC-ah raipuar COVID-19 hri kai nunna chan mi 4 an awm a, August thla chhung hian chawhrualin nitin raipuar COVID-19 hri kai mi 14 enkawl reng ang a ni a, tun thlengin nunna chan an awm lo a ni. ZMC hotute chuan damdawi leh inenkawlna hmanrua dinhmun a tha tih sawiin, damdawi awm loh vang emaw, Ventilator chan loh vang emaw, Oxygen hip tur neih loh vanga nunna chan an la awm lo tih an sawi bawk. Thawktu volunteers indaih-lohna a nasa hle tih sawiin, sawrkarah an thlen tawh tih an sawi a, Genomic Sequencing tihna tur khawl US $ 50000 man chu a thlawnin USA atangin an dawng dawn hnai tih an sawi bawk.

COVID-19 vaccine pekchhuah kawng ah nasa taka tan lak niin report thar berah COVID-19 vaccine First Fose pekchhuah zat hi India ram pumah 49% a nih laiin Mizoram-ah chuan 85% a ni tih he hunah hian tarlan a ni a, India ram State leh UT zingah Mizoram chuan a titha 8 na dinhmun a hauh a, Full dose pek zat (first dose la tawh atangin) hi India ramah 14% a nih laiin Mizoram-ah chuan 29% a ni a, India ram State leh UT zingah a titha dinhmun 6 na Mizoram hian a hauh bawk a ni.

Vaccine chhekkhawl dinhmun a tha tih he hunah hian tarlan a ni a, vaccine la la lo te lak kim tir turin beihpui thlak tum niin, ruahmanna siam mek a ni. School leh zirna In-a thawktu zawng zawngten vaccine an lak vek theihnan District Headquarters tinah ruahmanna siam tha tih a ni bawk.

Health Minister Dr. R. Lalthangliana chuan, “Hripui leng dona kawngah mitinin mawhphurhna kan nei a ni tih I hre thar theuh ang u,” tiin kan dinhmun a hma aiin kang deuh angin lang mahse inthlahdah chi a ni lo tih a sawi a, mahni hmun theuhah sawrkarin kan himna tura inkaihhruaina a siamte uluk tak leh fimkhur taka zawm theuh turin a chah bawk.

Comments

Chhiar Hlawhte