SRDC in zirlaite hnenah Sponsor-na sum hlan

Sialkal Range Development Council (SRDC) chuan SRDC Area-a Civil Services leh Technician zirlaite hnenah nimin khan tanpuina (Sponsorship) nimin khan an hlan.

SRDC hian UPSC Civil Services Coaching kal mek pakhat, NDA, X-Ray Technician leh Lab-Technician zirlai thlan bik, SRDC area a mite hnenah Sponsorship hi nimin khan an hlan a, hemi puala SRDC Chairman Office Chamber-a hun hman ah SRDC Chairman, L. Thangmawia MLA chuan Chief Minister zarah SRDC chuan hmel thar a hmu tih sawiin, ni danga tih ngai loh zirna lama SRDC sum hman theihna pawh kum 2019 khan Mizoram sawrkarin a siam sak tih a sawi a. He scheme hnuaiah hian zirlai thiam thei, khawsak harsa zual mi 23 lai tanpuina pek an nih tawh bakah SRDC area huamchhunga sawrkar sikul-a zirtirtu indaihlohnaah SRDC chuan zirtirtu kumtin a rawih sak tih a sawi bawk.

He hunah hian SRDC Chairman chuan Paukhanmunga, Primary School zirlai a nih laia Electric man avanga kut pahnih chan ta, chhungkaw harsa tak ni bawk, chuti chunga BA pass a MA hial zirzawm thei chu SRDC in zirlaite tana Ambassador tura a ruat thu puangin, ani atang hian kut ke kim nei, duh tawka kut hmang theite tana chona nasa tak a nih thu a sawi bawk.

He hun hi Ngulzathuama, Development Officer SRDC chuan kaihruaiin zirlai sponsor te hming tarlangin UPSC Civil Service Coaching, ALS New Delhi-a kal mek Neihhlupui chu Rs. 1,00,000/- a sponsor a nih thu te, Nikum 2019-a Mizoram atanga NDA interview tura tling awmchhun Muandingliana, Teikhang khua chu a interview-na tura Coaching kalna leh senso dang zawng Rs. 1,02,000/- tumsak a nih thu te, Dingmuansanga, Kawlbem, X-Ray Technician zir tur sponsor nan Rs. 36,000/- leh Vungthanpuii, Mimbung, Lab-Technician zirlai sponsor nan Rs. 36,000/- hlan an nih thu te a sawi bawk.

Hei bakah hian kum kalta 2019 leh 2020 khan zirlai First Division a pass, chhungkaw harsa mi 23 te tan Rs. 15,000/- zel, a vaiin Rs. 3,20,000/- chu SRDC in a pekchhuah thu te tarlan niin tunah hian SRDC area chhunga zirna In hrang hranga indaihlohna phuhruk tura SRDC sum atanga Zirtirtu 9 rawih mek an nih thu a sawi lang bawk.