Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Mizoram-ah hri kai hmuhchhuah an pung leh hret

Tunhnaiah Mizoram-a COVID-19 hri kai hmuhchhuah chu an pung leh hret niin a lang a, niminpiah khan Sample 9636 enfiah niin heng atang hian hri kai mi 740 hmuhchhuah leh an ni a, Sample enfiah atanga za zela 7.68 te chuan hri hi an kai a ni.

Niminpiah khan ZMC-a RT-PCR Laboratory-ah Sample 1224 enfiah niin heng te hi Aizawl leh Serchhip District atanga Sample lak te an ni a, heng atang hian hri kai 140 hmuh niin an vai hian Aizawl District atanga Sample lak vek an ni a, Veng mal a hri kai hmuhchhuah tamna ber Zemabawk-ah hri kai 15 hmuh niin Bethlehem Vengthlang leh Zemabawk North-ah 12 ve ve hmuh an ni a, a bak zawng hi Veng leh khua 36 ami an ni. Niminpiah khan Aizawl District-ah Fluorescent Immunoassay (FIA) Test hmangin mi 35 enfiah niin hri kai mi 4 hmuh an ni a, an vai hian Aizawl khawpui chhung ami te niin hri kaina chhui ngai vek an ni.

District hrang hranga TrueNat Laboratory-ah Sample 249 enfiah ni bawkin heng atang hian hri kai 31 hmuh an ni bawk a, an zinga mi 15 te chu Siaha District niin Lawngtlai District-ah 8, Hnahthial District-ah 6 leh Aizawl leh Serchhip District-ah pakhat ve ve an ni.

Niminpiah khan Rapid Antigen Test hmangin Mizoram-ah Sample 8128 enfiah ni bawkin heng atang hian hri kai mi 565 hmuh an ni bawk a, an zinga 302 te chu Aizawl District ami niin Bawngkawn-ah hri kai 31 zet hmuhchhuah leh an ni a, Republic Veng-ah 19 hmuh ni bawkin a bak te hi Veng leh khua 62 ami an ni. Heng bakah hian Kolasib District-ah hri kai mi 114 lai hmuhchhuah leh an ni bawk a, an zinga mi 20 te chu Saiphai khua an ni. Lawngtlai District-ah hri kai mi 53 hmuh an ni a, Lunglei District-ah 28, Siaha District-ah 25, Mamit District-ah 24, Champhai District-ah 13 leh Serchhip leh Hnahthial District-ah 3 ve ve hmuh an ni bawk.

Nimin khan Mizoram-a COVID-19 hri kai enkawl mi 281 te chu hri lakah fihlimin anmahni enkawlna hmun atanga chhuahtir an ni ve leh bawk a, heti hian nimin tlai dar 5:00 thleng khan Mizoram-a hri kai hmuhchhuah tawh chu 54,057 niin an zinga 47,473 te chu enkawl dam an ni tawh a, hei hi hri kai hmuhchhuah atanga chhutin za zela 87.82 niin tunah hian hri kai enkawllai 6383 an la awm mek a. Hri kai zingah mi 201 boral awm tawhin nimin khan he thu buatsaih lai thlengin hri kai zingah nunna chan an awmlo a ni.

Tun dinhmunah Mizoram District tinah hri kai enkawllai an la awm vek a, hri kai tamna ber Aizawl District-ah mi 3842 enkawl mek niin Kolasib District-ah 859 enkawl mek an ni bawk a, Lawngtlai District-ah 458 leh Mamit District-ah 363 enkawl an ni a. Hri kai enkawl tlemna ber Khawzawl District-ah mi 4 enkawl mek an ni.

Comments

Chhiar Hlawhte