Chanchin thar thenkhat :

AR hotu in CM a kawm

Mizoram Chief Minister Zoramthanga chu nimin khan 2nd Bn. Assam Rifles Commandant, Colonel Rajesh Kumar Nayak chuan a Pisa-ah hmuin an inkawm a, 2nd Bn. Assam Rifles te hi kumin July thla khan Manipur atangin Aizawl-ah an rawn insawn a, Mizoram an rawn awm vawi khatna a ni. He hunah hian Chief Minister chuan ruihhlo leh ralthuam tawlhruk dona kawngah te, dan lova ramri kan-a mihring lut leh venhimna kawng dang dangah Assam Rifles te nen thawh-hona tha tak an neih chhunzawm theih zel a beisei thu Assam Rifles Commandant hi a hrilh a. Col. Nayak chuan Mizo mipui leh sawrkar nen thawhona tha tak an neih chhoh a beisei thu a sawi bawk.

Polling Station siam belh rel

Nimin khan Hnahthial-ah District Election Officer, H. Dolianbuaia hovin Hnahthial District Level Standing Committee thukhawmin Hnah-thial District chhung South Tuipui Assembly Constituency huamchhunga hmalakna hrang hrang an ngaihtuah a. South Tuipui bial-a Darzo Polling Station-ah Voters 1054 a awm tawh avangin Election Commission of India-ah Polling Station hawn belh dil nise an tih bakah Asst. Electoral Registration Officer (AERO) pahnih - BDO leh SDC ruat belh nise, BLO damlohna avanga harsatna tawk thlakna tur leh BLO Supervisor-a hlankai thlakna tur pawh ngaihtuah niin pawm a ni bawk.

Zirlai tithate chawimawi

Beti Bachao Beti Padhao (BBBP) Siaha District hmalakna in nimin khan an District chhunga ku 2020-2021 chhunga MBSE hnuiaa HSSLC Examination a hmeichhe naupang zirlai pass tha zual 7 te chawimawina hun buatsaih a ni a. He hun hi Siaha District Bawrhsap, Kesavan R IAS chuan hmanpuiin zirlai naupangte hi thuziak, BBBP Mug leh tangkafai Rs.5000/- theuh a hlan a ni. Heng zirlai naupang te hi Distinction-a pass te vek niin Foxall HSS-a kal an ni a, Vawiin hian HSLC-a pass tha zirlaite chawimawina hun hman leh a ni ang.

Fairelbel-a sum DC-ah hlan

Aizawl-a Cable TV pahnih, Zonet leh LPS tangdun in August 20, 2021 zan-a zaithiam leh mipui hriat hlawh te nen TV kaltlanga Charity Concert, Fairelbel an buatsaiha sum tlingkhawm Rs. 23,45,000/- chu nimin khan Aizawl District Bawrhsap Dr. Lalhriatzuali Ralte hnenah an hlan a, Dr. Lalhriatzuali Ralte chuan chhawmdawl ngai mi harsate tanpui duhna nena tlawmngaia sum thawhtu zawng zawngte chungah lawmthu a sawi a ni. He hunah hian MKHC Secretary, Rev. Lalrinsanga chuan sum tlingkhawm te Pathian hnenah hlanin Fairelbel Utilization Committee chuan he sum tlingkhawm hi a dawng turte hnenah hun remchang hmasa ah an hlan leh dawn a ni.

Rawtna thehluh theih

Nakum (2022) India Republic Day-ah khian India khua leh tui te tana chawimawima sang ber Padma Award hrang hrang – Padma Vibhushan, Padma Bhushan leh Padma Shri dawngtute hming puan a ni leh dawn a. Hetiang chawimawina dawng thei khawpa mi hmingtha leh hnathawk tha, chawimawina phu hria te chuan mahni awmna District Bawrhsap te kaltlangin September 6, 2021 aia tlai lovah Under Secretary, Home Department, Govt. of Mizoram hnenah rawtna (nomination) thehluh theih a ni. Padma Award chungchang chiang zawka hre duh tan website: padmaawards.gov.in-ah chhiar chian theih a ni ang.

MLA in Mistiri bungrua semchhuak

Aizawl South-II bialtu MLA Lalchhuanthanga chuan a tum hnihna atan a bial chhunga Mistiri te tan Furniture Workshop a hman tur bungrua chhungkaw pariat te hnenah nimin khan a sem. Heng bungrua semna hun a chenna In-a neih ah hian Aizawl South-II bialtu MLA chuan ZPM chuan kut hnathawktu te hi ram hmasawnna hnuk pawimawh tak an ni tih hi an hrechiang tih a sawi a, “Chuvangin keini MLA te chuan kan phak ang tawk tawkin an dinhmun chawisan hi kan tum a ni a. Chumi tur chuan kan lo aupui fo thin ‘Bana kaih (Handholding policy)’ hi kan ngai pawimawh takzet a ni,” a ti a. Heng mistiri bungrua an inhlan te pawh hi tangkai tak leh hlawkpui taka hmang turin duhsakna a hlan bawk a ni.