Latest News

Chanchin thar thenkhat :

Mass Test neihna tlawh

Health Minister Dr. R. Lalthangliana chuan Lengpui leh West Serzawl-a COVID-19 Mass Testing neihna hmun te chu a tlawh a, heng hmun a tlawhna ah te hian Health Minister chuan Lock-down puan a nih khan tangkai tak leh awmze nei zawka chetlak an rel thu sawiin, hri inkai-chhawnna chhut chah mai bakah hri kaite rang taka hmuhchhuah zung zunga lakhran an nih theih nan Sample Test runpui (Mass Testing) neih an rel thu a sawi a. July 20 atanga nimin thleng khan Aizawl leh a chhehvel veng/khua 70-ah Mass Test hi kalpui a nih thu leh inthlahdul deuh tawh mah ila a tul anga kalpui zel a nih tur thu a sawi bawk. Nimin khan Mass Test hi Lengpui-ah hmun thum-ah neiin Sample 2333 enfiah atangin hri kai 23 hmuhchhuah an ni a, West Serzawl khua ah Sample 396 enfiahin hri kai 53 hmuh an ni bawk.


MRB Branch 91-na hawng

Mizoram Rural Bank (MRB) Branch 91-na ni turin nimin khan MRB General Manager, Amal Chandra Sarkar chuan Rajiv Nagar Branch thar a hawng a, he hunah hian MRB General Manager chuan hmun kilkhawr leh hla taka awm te pawhin Banking Service an hmuh theih nan sawrkar laipui in Regional Rural Bank chu India ram hmun hrang hrangah a din thu a sawi a. Nimin a hawn tak Rajiv Nagar Branch hian a chhehvel khua te tan hmasawnna a thlen ngei a beisei thu a sawi bawk.


Lei dawh chawlhsan turin ti

Bairabi bul Zophai ram, Ch. Chhunga leilet bul atanga Zophai IR Outpost panna kawng pum-pelh RCC hmanga Mizoram sawrkarin Lei a dawh mek chu nimin khan Assam Police ten chawlhsan turin an ti a. Lui kam tawna Lungrem chunga Lei dawhkaina tura Rod an phuar tawh Quintal nga (5) vel pawh Assam Police te hian phelh in, 207 Mini Truck-ah an hlang a, Assam lamah an phur thla nghal nia thudawn a ni. He Lei dawh mek hi Kolasib PWD Division hnuaiah kumin February thla atanga thawh a ni.


Ralthuam thuhruk man

Lawngtlai District chhimlam, Myanmar ramri dep ramhnuai-ah ralthuam thuhruk man a ni. Niminpiah khan an thudawn bawhzuiin 3rd Assam Rifle leh Lawngtlai Police tangkawp chuan Hmawngbu leh Kakichhuah inkar ramhnuai ah ralthuam thuhruk hi an haichhuak a, heng an ralthuam mante hi nimin khan Lawngtlai Police Station thlenpui niin tute dah nge tih tun dinhmun ah hriat a ni lo. An ralthuam man te hi Pistol leh silaimu te, Silai hlo leh Phone te, Geletine leh a tihpuahna hamnrua leh inbiak-pawhna lam chi te chu a langsar zual niin, Lawng-tlai Police Station-ah kawlthat a ni. An ralthuam man zingah Point 22 Pistol leh a Magazine te, AK-47 Magazine te, Geletine tlawn 24 leh silai hlo te, Opium te a tel a ni.

Comments

Chhiar Hlawhte