Latest News

Chanchin thar thenkhat :

NEC Secretary in CM kawm

North Eastern Council (NEC) Secretary K. Moses Chalai chuan nimin zing khan Chief Minister Zoramthanga chu a Pisa-ah hmuin, Mizo-ram a NEC hnuaia hmalakna te an sawidun a. Mizoram leh India hmarchhaka economy tih hmasawnna chungchang sawidunin, tanrualna a pawimawh thu an sawi a. K. Moses Chalai chuan Mizoram chu NEC project hrang hrangte a kalpui danah thawk tha a tih thu a sawi bawk. NEC Secretary hi L. Beimopha, Dy. Secretary leh Mehir Dey, Sr. Pvt. Secretary NEC ten an tawi-awm a. Chief Minister nen an inkawm hnu hian Additional Chief Secretary J.C. Ramthanga nen an inkawm leh bawk a ni.


Sangha chi sem tur enfiah

Fisheries Department changtu Minister K. Lalrinliana chuan nimin khan SEDP hnuaia Sangha vulhtute tih hmasawnna tura Mizoram District hrang hranga Sangha chi sem tur tharchhuak tura thlan Fish Seed Farm 7 zinga 3, Mizofa Fish Seed Farm, Chemphai; Ngente Fish Seed Farm, Chem-phai leh Ruattei Fish Seed Farm, N.Chawnpui te chu a hmun ah a endik a. Fish Seed Farm 7 atang hian Sangha chi nuai 45 chu September, 2021 chhunga semchhuah tum a nih thu sawiin, ram-chhung a Sangha chi tharchhuah ngei sem a ni tur chu lawmawm a tih thu a sawi bawk. Sangha chi hi Ngente Fish Seed Farm atangin nuai 6.5, Mizofa Fish Seed Farm atangin nuai 4.25 leh Ruattei Fish Seed Farm atangin nuai 7 sem tura ruahman a ni.


Hmun 75-ah Mass Test nei

Mizoram-ah July ni 20 atanga Sample Test runpui (Mass Test) kalpui a nih hnuah niminpiah thleng khan khua leh Veng 75-ah Sample 96,371 test niin hri kai mi 2830 hmuh an ni a, positivity rate hi 2.93% a ni. August thla chhung bikah ni 26 thlengin Sample 1,86,502 test a ni tawh a, heng atang hian hri kai mi 16,831 hmuhchhuah niin, positivity rate hi 9.02 a ni a, mi 58 in nunna an chan tawh bawk a ni.


Police in thu diklo tih sawi

Mizoram Police te chuan thuchhuah siamin tunhnaiah Mizoram Police hnuaia Sub-Inspector leh Constable hnaruak awm dil theih angin web-page pakhat www.fresherjobnearme.com-ah tarlan a ni tih sawiin, hei hi thu diklo leh inbumna a ni tih an sawi a. “Mizoram Police-in hetiang hnaruak dilna Advertisement hi engmah chhuah a nei lova, he Advertisement lem thehdarh mek lakah hian fimkhur turin mipuite kan inngenin kan inhriattir a, he thu diklo thehdarhtute hi chhuichhuak turin hma lak nghal a ni,” an ti bawk.


SAI in Lalremsiami an chawimawi

Tokyo Olympic neih zawh taka India Hmeichhe Hockey Team a tel Lalremsiami chu nimin khan Sports Authority of India (SAI) STC Aizawl buatsaihin chawimawina hun hman a ni a, he hunah hian amah lo enkawl tawhtu Chief Coach (Rtd) Lalrampari chuan Lalremsiami’n Hockey Training a  neih chhoh dan hrang hrangte a sawilang a ni.

Comments

Chhiar Hlawhte