Rice Mill commission dan tur sawihona neih a ni

Mizoram-a a hmasa ber ni tura Kolasib District chhung, Pangbalkawn khua a Rice Mill bun mek commission dan tur chungchang chu nimin khan Agriculture Minister hova sawiho a ni.

Agriculture Minister C. Lalrinsanga hova a Pisa-a thutkhawm ah hian Minister chuan Pangbal-kawn-a Rice Mill buatsaih mek chu commission theih mai tawh tur a nih thu sawiin, buh thar tihpun a nih zual theih nan Agriculture Department leh Irrigation & Water Resources Department tangkawpin kum khata buh vawi 2 thar thei tura ruahmanna kalpui mek a nih thu a sawi a. Modern Rice Mill din tura Sawrkar hmasa lama hmalakna bul lo in tan tawh chu changtlung zawka a hmawr bawk pui ngei a nih theih nan tun sawrkar hian theihtawp a chhuah mek a ni, a ti.

Mizoram sawrkarin Mizoram-a buh chingtute leh leilet neituten hlawk zawk leh awmze zawka he Rice Mill hmanga an buh thar te an tihral theihna turin Collective Farming system duan mek a nih thu he hunah hian tarlan a ni a. System thar ah chuan buh chingtute chu Farmers Producer Organisation (FPO) anga enkawl an ni ang a, an tharchhuah te chu he Rice Mill-ah hian lakkhawm a, mumal taka tihral tum a ni thu Meeting-ah tarlan a ni bawk.

He Rice Mill hian darkar khat-ah buhhum Metric Ton 5 a her thei a, a hmunhma leh building te erawh darkar khat a Metric Ton 10 her thei tura ruahman a ni a. Kum khat chhungin buhfai quintal nuai hnih chuang her chhuak thei tura beisei niin he Rice Mill-a her tur buhhum lei sak dan tur te leh a hralhchhuah leh dan tur kalhmang te sawiho a ni bawk.