Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

MZP in Mizoram Rajya Sabha MP an chawimawi

MZP General Hqrs. chuan nimin khan Mizoram Rajya Sabha MP K. Vanlalvena chu chawimawina thuziak hlanin Tawlhlohpuan an bahtir bawk.

MZP General Hqrs. Office, Aizawl-a he hun hman hi an President, B. Vanlaltana chuan kaihruaiin MZP chuan kan ram leh hnam tana thawhhlawk leh ram damna tura thawk tha tupawh chawimawi phu te a chawimawi thin tih a sawi a. Tunhnaia Mizoram leh Assam ramri buaina avanga inkahna thlengah Mizoram Rajya Sabha MP, K. Vanlalvena chuan Zofate thlavang na taka a hauh avângin a nunna leh a dinhmun thlengin hlauhawm dinhmunah a ding nia sawiin, “Chuti chung chuan huaisen taka Mizoram leh hnam tân a ding tlat chu chhuanawm kan ti hle a. He kan MP chetdan hi chawimawi leh fak phu nia kan hriat avangin MZP chuan chawimawina thuziak leh Tawlhlohpuan kan bahtir a. Hun lo kal leh zel turah pawh ram leh hnam tana huaisen taka ding tlat turin MZP chuan beiseina sang tak nen kan thlir reng dawn a ni,” a ti.

He hunah hian Rajya Sabha MP K. Vanlalvena chuan MZP ten chawimawina an hlan chu lawmawm a tih rualin phulo a intih thu a sawi a, Mizoram Police leh Assam Police inkahna chu hnam anga thinlung hmun khat min put tirtu a ni tih sawiin, “Mizo mipuiten tanrualna leh ram hmangaihna tak tak thinlung kan putzia a lan avângin a lawmawm hle a ni. Hun lokal leh zel turah pawh buaina leh harsatna kan tawh châng pawh a ram hruaitute sel mai lo a, lungrual taka thawkho zawk tûrin Mizo mipuite ka sawm a ni,” a ti bawk.

Comments

Chhiar Hlawhte