Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

ZPM Party Working President thar atan Vice President nilai K. Sapdanga puan a ni

Zoram People’s Movement (ZPM) Working President atan K. Sapdanga ruat a nih thu nimin khan puan a ni.

ZPM President Lalliansawta chuan hun engemaw chen taksa lamah harsatna a neih avangin ZPM thuneitu sang chuan Working President neih tha tiin Working President ruat turin Val Upa Council (VUC)-ah ngenna thlenin nimin, August 23, 2021 khan VUC Chairman, Lalfakzuala IAS (Rtd) chuan ZPM Working President atan K. Sapdanga ruat a nih thu a puang a. Aizawl-a ZPM Office-a he hun hmanna ah hian he hun kaihruaitu ZPM President Lalliansawta chuan natna avangin hun rei tak, thla 10 dawn lai President hna chelh thei lova a awm chhunga President mawhphurhna lo kalpuitu K. Sapdanga chu Val Upa Council Working President-ah an ruat chu lawmawm a tih thu a sawi a. ZPM in Val Upa Council leh Leader an neih thu hi mi thenkhatin an hrethiam chiah lo deuh tih pawh sawiin, “ZPM chu thunei bik pawh an awm lo, inthlanah lo tling tehreng pawh nise engtia tih nge an tum, President an nei a, Leader an nei leh bawk a chubakah VUC thunei tak an awm bawk si a, tunge thunei ang a, tunge Chief Minister ang, an buai nghal a ni mai tiin an sawi thin. Keini chu kan buai lo,” tiin an party Dan-ah President leh CM nih kawp a remloh thu a sawi bawk.

ZPM Working President thar K. Sapdanga chuan Working President mawhphurhna sang hle mah se, mahni-a thawh tur a ni lo tih sawiin, “Kan mualpho bik lo ang tih ka beisei,” a ti a. “ZPM-in lu kan sun a, kan hotu tangkai tak, Pu Andrew H. Thangliana, Tuirial bialtu MLA chuan August ni 17 khan chatuan ram min pansan a, kan mittui pawh a la hul lo a. Kan sawrkar lam hi a hmanhmawh dawn riauin kan hria a. Keini thlaphanga ICU lama kan luh hlan khan Campaign Kick-Off programme ni awm tak an lo hmang tawh a. Chuvangin Tuirial bial-a kan hotupa sulhnu chhunzawm thei turin, mittui nen hna bul tan a ngai dawn a nih hmel a, a huphurhawm lehzual hle mai. Bial mipuite khawngaihna leh lainatna kan hmachhuan ve leh ngawt mai a ni ang chu,” a ti bawk.

He hunah hian ZPM Leader Lalduhoma pawhin, “Kan Party hmalam hun thlirin Working President neih a tul zia party thuneitu sang PAC-ah thlen a ni a. Working President tura kan rilru a awmsa leh kan lo tinzawnsa Pu K. Sapdanga chungah a lo tla ta a. Ani hi kan President theih loh hlan a hneh taka min lo kaihruaitu a ni a. AMC inthlan te, Serchhip Bye-Election te a kaihhruaina hnuaiah hneh takin kan lo hmachhawn tawh a. Amah hi a resourceful em em a kawng hrang hrangah he mawhphurhna chelhtu atana ruat a ni hi lawmawm kan ti takzet a ni,” a ti a. ZPM chu Party hrang hrang inzawmkhawm an nih avangin engemaw chen kha chu neuh neuh an nei lo thei lo tih sawiin, “Amaherawh chu, tunah chuan Pathian kaihhruaina a zarah kan paltlang tawh,” a ti bawk.

Comments

Popular News (Last 30 Days)