Latest News

Mizoram State Law Commission in Eighth Schedule-a Mizo tawng (language) telh ve tura thlen an rel

Mizoram State Law Commission chu nimin khan an Chairman Lala Khobung hovin an thukhawm a, Dan hmanlai thenkhat chu siamtha turin sawrkar-ah thlen tura rel niin Eighth Schedule-ah Mizo tawng (language) chu telh ve turin sawrkar-ah thlen nise an ti.

Mizoram State Law Commission Chairman Pisa-a he thutkhawm hi thutkhawm vawi 39-na niin Chairman chuan member-te inpeknaah lawmthu a sawi a, ram leh hnam tan an thiamna leh ngaihtuahna te nasa lehzuala hmang turin a sawm a. COVID-19 vangin Law Commission-in duh angin hna a thawk chak thei lo chu pawi a tih thu a sawi bawk.

He thutkhawm ah hian State sawrkar-a thlen tur an rel zingah Article 342 of the Constitution of India behchhana President of India-in ‘The Constitution (Scheduled Tribes) Order 1950 (Part III - Rules and Order under the Constitution)’ a tihchhuaha Scheduled Tribe list a tarchhuah ah Mizo Hnam pumpui sawina ni awm taka ‘Any Mizo (Lushai) Tribe’ tih chu Lushai nilo Mizo hnahthlak dang tan Mizo zinga tel ve lo leh Mizo hian a huam ve lo a inngaihna a awm theih bakah harsatna neuh neuh a awm phah bawk avangin ‘Any Mizo (Lushai) Tribe’ tihah hian bracket leh Lushai hi paihin ‘Any Mizo Tribe’ ti turin sawrkar-ah thlen nise an ti a, The Constitution (Scheduled Tribes) Order, 1950 hnuaia Scheduled Tribes List State leh Union Territories-a ‘Any Mizo Tribe’ tih la tel ve lo te-ah ‘Any Mizo Tribe’ hi telh vek nise an tih bakah The Constitution (Scheduled Tribes) Order, 1950 Part II - Assam-a ‘In the Autonomous Districts of Karbi Anglong and North Cachar Hills’ tih chu paih nise an ti bawk.

Mara leh Lai hnam te pawh an hnam hming dik tak zawk nia an hriat avangin an District Council hming ni thin ‘Pawi’ leh ‘Lakher’ pawh ‘Lai’ leh ‘Mara’ tia thlak a nih hnuah ‘The Constitution (Scheduled Tribes) Order, 1950’-a Pawi leh Lakher tih la ni chu thlak vat turin an rel bawk.

Hei bakah hian India Danpui Article 344(1) leh 351 tlawhchhana siam Eighth Schedule-ah Assamese/Bodo/Manipuri/Nepali, adt. tawng (languages) te telh a nih vangin All India Service Competitive Exam hrang hrang UPSC, SSC leh State Public Service Commission huai-hawtah hian Subject/Syllabus-ah an tawng a tel ve avangin nasa takin a chhawk tih he hunah hian sawilan niin, Eighth Schedule-ah Mizo tawng a la tel ve lo chu Mizoten midang an tluklohna chhan pakhatah Law Commission chuan a ngai a. Hei vang hian Eighth Schedule-ah Mizo tawng (language) hi telh ve nise an ti bawk.

Chapter IX of Criminal Procedure Code (Cr.P.C.)-ah mawhphurhna (maintenance) chu Nupui, Fanau te leh nu leh pa te chauh a huam avang leh tunlai hian pi leh pu (grandparents) te ngaih-tuahtu mumal awmlo an awm tak zeuh zeuh avangin ‘Grand Father and Grand Mother’ hi telh nise an ti bawk.

Mizoram-a Autonomous District Council-ah te Defection (pawl pakhat atanga pawl danga insawn) a awm thin vangin sawrkar nghet din theih loh chang a awm thin avang leh hei hian corruption a hrin theih avangin Autonomous Council ten anmahni Rules siam hmanga Anti-Defection Law an neih/siam te chu Dan mit atanga thlirin a dik tawk lo tih an sawi bawk a. Hei vang hian Tenth Schedule to the Constitution of India (Provisions as to disqualification on grounds of defection) hi Mizorama Autonomous District Council-ah te hman nise an ti bawk.

He hunah hian The Mizo Marriage, Divorce and Inheritance of Property Act, 2014 tuna hman mekah siamthat leh ennawn ngai MHIP Gen. Hqrs. leh Central YMA atanga rawtna leh Autonomous District Council atanga thu lut bakah thil dang te chu ngun lehzuala zirchian chhunzawm leh tura tih a ni.

Comments

Popular News (Last 30 Days)