Latest News

A pung um-a pawisa dahna nia sawi chungchang Serchhip Police ten an chhui zui mek

Tunhnaia Serchhip-a a pung um-a mi thenkhat ten pawisa an dahna chungchanga harsatna thleng chu Serchhip Police ten chhui zui mekin pawisa an dahna nia sawi Jenny Malsawmtluangi, Serchhip Dinthar Veng pawh Police ten thu an zawtfiah tawh a. A hnena sum dah nia insawi te chuan an sum dah ang tal hmuhlet theih an duh thu an sawi bawk.


He thil thleng chungchanga nimin a thuchhuah a siamah Serchhip SP, Stephen Lalrinawma chuan kum 2017 vel atang khan Jenny Malsawmtluangi w/o Vanlalvena, Serchhip Dinthar Veng chuan mi hrang hrang (sawmnga aia tam) hnen atangin dan kalh a pawisa dahpunna a kalpui tih sawiin, a pung sang tak tawktar in mipui hnen atangin pawisa a la khawm thin a. Thla hnih leh a chanve chhunga a pung 15% te a dahpun sakin, heng a pawisa lakkhawm te hi hnathawh tak tak nana hmang lovin, pawisa dahtu thenkhat te pung (interest) pekchhuah nan a hmang leh thin tih hriat a nih thu a sawi a. Chutianga hun engemaw chen a kalpui hnu chuan a hnena pawisa dahtute duh ang zat pawisa pechhuak seng ta lovin kumin May thla vel atangin a pung leh a sum lu (capital) te a pekchhuah that theih tak loh avangin a hnena pawisa dahtute chu an hlauthawng tan a. A hnena pawisa dahtu (Depositors) thenkhat lungawi lo leh mangang te chuan nizan hmasa (August 19, 2021) zan dar 7:00 vel khan Tuikhuah Veng-a a Dawr, PC Store-a a thil zawrhlai thenkhatte chu leiba aiah tiin an lak sak a, he buaina thleng hi Police hnenah thlen niin, Police te chuan rang takin hma an la nghal tih a sawi.

Serchhip SP chuan Jenny Malsawmtluangi hnena pawisa dahtute hi mi 50 aia tam mah ni a hriat an nih thu leh chung miten tun thlenga pawisa lak leh tur an la neih belhkhawm chu cheng nuai zanga (500) vel a tling hial a hriat a ni tih sawiin, hetiang hi thil awm dan anih avangin mipui te chi-ai lovin fimkhur taka awmin Police te hmalakna lo thlawp tur leh lo ngaichang turin a ngen a. Serchhip SP chuan mipuite chu kan pawisa thawhchhuah hlu tak te hi sum leh pai it avanga dan kalh a pawisa dahpunna ah te dah lo tura chahin, “Pawisa lakhawm (collect)-a a pung nena sem chhuak leh tur chuan sawrkar phalna lak hmasak a ngai a, pawisa pung tur zat pawh RBI bituk/phal chin a awm thin a ni,” a ti a. Bank pangngai aia pung tam tak a pe let leh thei nia insawi te hi phalna an neih leh neih loh hriat hmasak loh chuan dawr loh hi a him ber tih pawh sawiin, “Hetianga dan kalh a thil ti thin te hi an lakah thubuai siam sak theih a ni bawk tih hi mipuite kan in hriattir nghal a ni,” a ti.

He thil thleng a mawhphurtu ber Jenny Malsawmtluangi hi Serchhip Police te chuan an lak tawh thu leh thu pawh an zawhfiah tawh thu sawiin, nizan hmasa-a buaina a thlen hnu hian an In pawh dap tawhin engmah hmuh an neih rihloh thu an sawi a, hemi chungchangah hian FIR lut ala awmloh thu pawh sawiin, amaherawh chu a theih ang anga a chhui hna an thawh thu leh Jenny-i hian sum chungchang chhinchhiahna a neih pawh hmuh tur a awmloh thu an sawi a. Amah hian Bank Account 5 neiin heng te pawh hi khawihchet theihloh tura dahin, hetianga pawisa khawih tur hian sawrkar atangin phalna a neihloh thu an sawi bawk.

Jenny Malsawmtluangi hnena pawisa dahtu nia insawi mi 22 te chu nimin khan Serchhip Police Station-ah kalin Police ten thu an zawtfiah ve bawk a, pawisa dahtu thenkhat te chuan a lo intiam tawh anga a pung nen pawisa hi an hmu theilo a nih pawhin an sum dahluh ang tal chu hmuhlet an duh thu an sawi ve bawk a ni.

Tarlan tawh angin nizan hmasa a PC Store atanga mi thenkhat ten bungrua an lak hnuah he Dawr leh an Kudam chu Police ten khawihchet theihloh turin an hreng mek bawk a. Mi thenkhat chuan Dawr atanga bungrua an lak tawh te pawh Police te hnenah an pelet tih Police te chuan sawiin, Jenny-i te In pawh hi a tul anga enfiah leh tur a nih thu an sawi a. Jenny-i hian dawr hawnna tan hian Bank Loan a lak thu pawh an sawi bawk.

Comments

Chhiar Hlawhte