Inremna ziah pawhsei a ni

School Education Department leh Door-darshan Kendra Aizawl te chuan DD Mizoram channel-a Educational TV Programme chhunzawm nan nimin khan inremna an ziak.

School Education Secretary Office Chamber-a inremna an ziah ah hian School Education Department aiawhin Secretary Dr. Lalzirmawia Chhangte leh Doordarshan Kendra Aizawl aiawhin Head of Programme Vanlaltlana Varte chuan an hming an ziak a ni.

He hunah hian School Education Secretary Dr. Lalzirmawia Chhangte chuan kum 2015-a bul tan Educational TV Programme chhun-zawm zel a ni chu lawmawm a tih thu a sawi a. Tunlai khawvelah Classroom Teaching bakah Technology thar ber ber hmanga zirtirna kalpui hi a pawimawh a ni, a ti a. Hripui leng avang hian eng chen nge class pangngai a khaihlak dawn hriat a ni lova, Academic Session liamta ah pawh Tutorial Class chu DDK leh Cable TV te nen hlawhtling takin kalpui a lo ni tawh a, naupang in mit-a an hmuh hmanga zirtirna hian an thiam theihna a tipung a. Chuvangin, TV programme hi mipui zirtir nan leh naupang zirtir nan a pawi-mawh hle a ni, a ti.

DDK Head of Programme Vanlaltlana Varte pawhin DDK chu a tira a din chhan ber pawh 'education' hi a ni a, hmuhnawm leh en nuam ringawt hi a din chhan a ni lo, a ti a. Sawrkarin Programme a neihte tichhuak a, mipuite zirtir hi a hna a ni tih sawiin, Educational TV Prog-ramme chhunzawmna atana thawhdunna ziah a ni leh ta chu lawmawm a tih thu a sawi bawk.

Educational TV Programme hi School Education, SCERT leh MBSE te tanghova siam thin a ni a, September 2021 atangin kum khat chhungin chawlhkar tin Ningani apiangin tlai dar 6:00-6:30pm inkarah programme tihchhuah chhunzawm a ni dawn a ni.