Latest News

Health Minister hovin Serchhip-ah COVID-19 hri leng chungchang thlirhona neih a ni

Health Minister Dr. R. Lalthangliana chuan nimin khan Serchhip District rawn tlawhin District Level Task Force on COVID-19 te nen Serchhip DC Meeting Hall-ah COVID-19 hri leng mek chungchanga hmalak dan an thlirho bakah Third Wave lo thleng thei chungchanga hmalak dan te an thlirho bawk.


Serchhip District Bawrhsap Lalmuansanga Ralte kaihhruaia thutkhawm neih ah hian Health Minister Dr. R. Lalthangliana chuan COVID-19 hripui dona kawngah Serchhip District in hma a lak that avangin Vawiin thlengin dinhmun tha takah a ding tih an hmu tih sawiin, lawmawm a tih thu a sawi a. Hripui hian engchen nge min chamchilh zel dawn tih kan hriat loh avangin tha thlah lova lo bei chhunzawm zel turin a chah a. Serchhip leh Lunglei District chu COVID-19 dona lama sawrkar sum bak sum hnar dang, Corporate Social Responsibility sum dapchhuah kawngah an thawk tha hle tih pawh sawiin, lawmawm a tih thu a sawi a, District entawntlak a nihna a lan thu a sawi bawk.

Health Minister chuan ‘Health’ in a tum ber chu nunna chhan a ni tih sawiin, hri leng dona kawngah Test Kit leh damlo enkawlna hmanrua te leh mamawh dang awm thei apiangte sawrkarin a ngaihtuah reng tih sawiin, thlaphanna tur a awmlo tih a sawi a, hri kai tamna hmuna Mass Test neih chu hri darh tur chhutchahna atan a pawimawh thu sawiin, a tulna hmun apiangah lo ti zel turin a chah bawk.

COVID-19 thawh thumna lo thleng leh tura ngaih ah naupangte chu a tuar na thei nia sawi a awm avanga Serchhip District in naupangte enkawlna tur TRAUMA Centre Extention Building-a Ward leh ICU an ruahman dan te he hunah hian tarlan niin heng hmalakna hrang hrangte hi Minister chuan tha a tih thu sawiin, heng inbuatsaihna enpui tur hian mithiam an rawn tirh thuai tur thu Minister chuan a sawi bawk.

Serchhip District-a COVID-19 vaccine la thei kum 18 chunglam mi 47,731 te zingah zaa 85.3 te chuan Vaccine Dose 1-na an lak tawh thu he hunah hian tarlan niin Health Minister chuan lawmawm a tih thu leh tanlak zel erawh a tul thu a sawi a, Mizoram-ah vaccine mamawh khawp a awm thu sawiin, Vaccine la tawh te hian hri an kai theilo ni lovin hri kai mah se an tawrhna a nepin ICU-a dah ngai phei chu an awm manglo tih a sawi bawk.

Health Minister hian COVID-19 hri kai tawhte zirchianna atangin tha taka Hmai tuama, Kut sil taima ten an kai tlem bik hle tih hmuhchhuah a ni tih pawh sawiin, hei hian mitinin mawh-phurhna pawimawh tak kan nei tih a tichiang tih a sawi bawk.

He hunah hian Serchhip District SP, Stephen Lalrinawma chuan hri leng dona kawnga Police te hmalak dan tarlangin tunah hian Police ten hmun 6-ah Duty Post neiin zan lamah dar 1:00 thleng an duty thin thu a sawi a, Police Flying Squad din a nih bakah hmun hrang hranga an Duty-na ah dan bawhchhia mi 5635 man tawhin heng mite pawisa chawi tlingkhawm chu Rs. 7,12,900/- a tlin tawh thu a sawi.

Serchhip SDO (Sadar) C. Laltleipuii pawhin hri leng dona kawnga Serchhip District hmalakna tarlangin, hri kai enkawlna hmun CCC 6 leh 4C 13 siam a nih tawh thu leh Quarantine Facility 6 te Serchhip District-ah a awm thu a sawi a, hmun hrang hrang atanga hri leng dona hmanrua Serchhip District in a dawn tawh te pawh a tarlang bawk.

IDSP-a District Surveillance Officer Dr. Lalngaihawmi Chhangte pawhin Serchhip District-ah Sample 22,650 enfiah a ni tawh tih sawiin, hri kai 968 hmuh an nih tawh thu leh an zinga 875 te chu enkawl damin mi 90 enkawl mek an nih thu a sawi a, hri kai zingah mi 3 boral tawhin Serchhip atangin hri kai mi 50 te chu ZMC-ah enkawl tura thawn an nih tawh thu he hunah hian a tarlang bawk.

Comments

Chhiar Hlawhte