Latest News

AMC Area pawn lamah inkhawm theih dan ruahman

Mizoram sawrkar chuan hri leng avanga Aizawl Municipal Corporation (AMC) huamchhunga Partial Lockdown a kalpui mek chu chawlhkar khat dang a pawtsei leh a. Inkaihhruaina thenkhat erawh a thlahdula tihdanglam niin AMC Area pawn lama hri kai awmlohna khua ah te chuan Inkhawm theih dan tur ruahman a ni.

September 4, 2021 zanlai dar 12:00 thleng Partial Lockdown puanga inkharkhip a pawhsei lehah hian AMC huamchhungah Kohhran Inkhawm pangngai neih la phal lo mah se, zing leh tlai tawngtai inkhawm erawh phal a ni a. Kohhran Rorel Inkhawm (Bial Inkhawmpui) pawh chhun lamah neih phal ni tawh a. AMC pawn lamah erawh COVID-19 case awm lohna khua ah te chuan Deputy Commissioner (DC) leh VLTF te ruahmanna in Inkhawm phal niin School leh Anganwadi an kal thei anga. District Magistrate ten zan curfew (7:00 PM to 4:00 AM) pawh an puang leh dawn a ni.

Sakhaw Biak In-a Inkhawm leh inkhawmpui chungchangah inkaihhruaina tharah hian Biak In-a leng zat chanve (50% seating capacity) emaw, mi 200 aia tam tel phal a la ni lova. COVID-19 symptom neite inkhawmpuiah hian tel phal a nih loh bakah natna benvawn nei leh kum upa hriselna chak tawhlo te a theih chin chinah awl nise tih a ni. Inkhawmpui neihnah hmunah hian CAB khauh taka kenkawh leh zawm tur a ni a, zai leh tlai lam ruai buatsaih phal a la ni lova. A thlengtu Kohhran-in LLTF/VLTF te phungbawma sawmin CAB/SOP Implementation Committee din tura tih a ni bawk.

AMC huamchhunga inkaihhruaina tharah hian Zirna In hawn phal ala ni lova, Picnic Spot leh Public Park te hawn phalloh a la nih laiin, Sports Practise (indoor & outdoor) chungchangah Indoor-ah mi 10 aia tam lo leh Outdoor-ah mi 25 aia tam lo phal a ni tawh a. Sports inelna, Tournament, adt. (Indoor & Outdoor) te phal a la ni lo thung. Gym hawn phal tawh niin, Gym capacity 33% aia tam tum khata workout loh tur a ni a, Gym kal turte chu COVID-19 Vaccine dose khat tal la tawh an ni tur a ni a, COVID-19 Symptom neite an tel tur a ni lo thung. Mipui punkhawmna Anniversary leh thildang lawm te chu phal ni lovin a huho-a pawn chhuahna chi hrang hrangte pawh khap ala ni bawk.

Tourist Lodge, Hotel, Homestay leh khualbuk dangte ah mikhual thlen phal a ni a. Restaurant erawh pawn lam mi tan dawr phal ni loin, nitin Home Delivery phal a ni a. Eichawp dawrte chu nitin zing dar 5:00 atanga zan dar 9:00 thleng hawn phal a ni bawk.

AMC area pawn inkaihhruaina chu Deputy Commissioner (DC) ten an District chhunga Covid-19 hri len dan dinhmun azirin inkaihhruaina siam tura tih a ni bawk.

Comments

Chhiar Hlawhte