NEC Project 15 kumin ah zawh hman beisei a ni

North Eastern Council (NEC) hnuaiah Project thawhlai 26 Mizoram-ah awm mekin heng zinga 15 te chu kumin sawrkar kum chhung hian thawh zawh hman beisei a ni.

Nimin khan Aijal Club-ah North Eastern Council (NEC) sum hmanga Mizoram chhunga hmasawnna kawng hrang hrang thawh mek project 26 te thlirhona hi neih niin he hunah hian Planning Secretary Lalmalsawma chuan Mizoram in NEC Fund atanga hna a thawh mek sawifiahna hun a hmang a, tun dinhmunah project thawh mek 26 awmin chung zinga 15 te chu kumin sawrkar kum chhung hian thawh zawh hman beisei a ni tih hi tarlan niin khaihlak awm lova zawh vat a nih theih nan hmalak nise an ti a ni.

He thlirhona hun hi NEC Secretary Moses Chalai chuan rawn telpuiin Chief Secretary Lalnunmawia Chuaungo chuan NEC Secretary hova Mizoram-a NEC Review Meeting neih a ni chu lawmawm a tih thu a sawi a. NEC hian hmarchhak State hrang hrangah nasa takin hmasawnna hna a thawk tih sawiin, Mizoram pawh NEC hmalakna chhawr tangkai ber te zingah a tel a ni, a ti.

NEC Secretary Moses Chalai pawhin hmarchhak State te chu ASEAN ram te nena inhnaih taka awm an nih avangin insumdawn tawnna kawngah an hmabak a eng hle tih a sawi a. Heng ram atanga lakluh (import) lam hawi ringawt ni lovin, thawnchhuah (export) kan nei ve tur a ni, Mizoram chu NEC sum atanga project kalpuite an thawk tha thawkhat nia a hmuh thu a sawi a. A hun takah sum an dawn theihna turin NEC Pisapui-a thehluh tur tul ang a hun taka thehlut thin turin a chah bawk.