Chanchin thar thenkhat :

Agri. Minister in tlawh

Agriculture Minister C. Lalrinsanga chuan Inrinni khan Lungleng North leh Lungleng-I te tlawhin khawtlang hruaitute leh tlawmngai pawl hruaitute nen Agriculture a hma an sawn theih dan tur sawihona an nei a. He hunah hian Agriculture Minister chuan Lungleng North leh Lungleng-I khua chu Aizawl khawpui Kurtai leh thlai lama chawmtu pawimawh tak an nih thu a sawi a, Agriculture lamah potential tha tak an neih chu nasa lehzuala chhawr tangkai tula a hriat thu te, buh leh bala intodelh a pawimawh zia a sawi bawk. Lungleng khua ten thlai chinna hmun an neih dan chu Minister hian a enpui nghal bawk.

Silchar Jail-ah Driver dah

August 17, 2021 a inbumna avanga Assam Police ten an man nia ngaih F. Lalrotluanga, Bilkhawthlir chu Silchar Central Jail-ah dahluh a ni tawh nia thudawn a ni. Thudawn danin, Burma kuhva phurh tirtu nia hriat hnamdang pakhat chu Assam Police te hian manin, Jail ah an dah tawh bawk a, F. Lalrotluanga motor chu Dholai PS-ah an kawl nia hriat a ni bawk. F. Lalrotluanga chhungte chuan Assam Police ten thubuai an kalpui zel dan hriatzui an nei hlei thei lo tih an sawi a, Mizoram Police te pawhin boruak thlira Assam kal rihlo tura thurawn an la pek rih thu an sawi a. Silchar Mission Compound-a awm te leh Silchar YMA ten an lo ngaihven sak thin a, chu chu tuna a chanchin an hriat theih dan a ni tih an sawi bawk.

MLA in tanpuina semchhuak

I&PR Minister leh Aizawl West-II bialtu MLA Lalruatkima chuan nimin khan a bial chhung Tuikual South, Tuikual North, Dinthar, Dawrpui Vengthar, Vaivakawn leh Kanan LLTF te kutah India Formosa Foundation atanga dawn Oxygen Concentrator pahnih theuh leh pawisafai Rs. 50,000/- theuh a hlan a. Aizawl North-II bialtu MLA, Dr. Vanlalthlana pawhin Inrinni khan a bial chhunga Taxi Welfare 11 te hnenah an Member harsate an tanpuina turin ama sum Rs. 1,10,000/- chu a semchhuak bawk.