Mizoram PWD in CM thil hawn an sawifiah

Mizoram PWD chuan thuchhuah siamin tunhnaia Chief Minister in KDZKT Road a hawn chungchang chu an sawifiah.

Mizoram PWD in thuchhuah an siamah hian Khedacherra - Dam-cherra - Zamuang - Kawrthah - Tuilutkawn (KDZKT) kawng hi KM 89.50-a sei a ni tih tarlangin, he kawng hi Chief Minister zahawm takin zawh tawh chin KM 84.50-a thui chu August 13, 2021 khan a hawng tih an tarlang a. He kawng siam nana sum petu, NEC Shillong lamin India Independence Day vawi 75-na den-chhen a hawn an duh avangin a zawh tawh chin KM 84.50 hi hawng mai tura thurawn an pek thu leh kawng hawn chin hi KM 84.50 a nih thu hi kawng hawn ni-a Technical Report leh Banner tar-ah te pawh chiang taka tarlan a ni tih an tarlang.

Tuna la zawh loh KM 5 hi Dampa Tiger Reserve area chhung a nih thu leh clearance hrang hrang neih hmasak a tul avangin hna hi tan tlai deuh a nih avanga la zawh loh mai chauh a ni tih an tarlang bawk.

Hei bakah hian Bairabi luh dawn a Kawnpui Lui Bailey Bridge hawn tak chung-chang pawh PWD chuan sawifiahin, he Lei hi a dawhtu Contractor ten an thawhzawh thlap hnu, commission a nih hnu chauh a bill pek theih anih avangin a approach hnadang zawhfel hma, January 5, 2021 khan Chief Minister chuan hawngin commission a ni tih an sawi a. Lei hawn a nih hian Lei bul, Lei luhna tur (Bridge approach) tawite, Bridge contract hna nen inzawmna neilo chu siamthat hlek a ngaih avangin chumi hun chhung atan Lei kha hman a la remchan loh thu leh Lei hawn tak erawh felfai taka zawh vek a ni tih an tarlang a. Thudik tluangtlinglo deuh van-tlang hriat tur a awm thin chu pawi an tih thu an sawi bawk.