Serchhip District-a hri kai hmuhchhuah zingah kum 18 hnuailam an pung chho mek

Serchhip District-a COVID-19 hri kai zingah kum 18 hnuailam an pung chho mek nia thudawn niin naupang hri kai te enkawlna tur pawh ruahman mek a ni.

Serchhip CMO Office atanga thu kan dawn danin tunhnaiah Serchhip District-a COVID-19 hri kai hmuhchhuah zingah kum 18 hnuailam hi an pung chho ve zel a, nimin thlenga Serchhip District atanga hri kai hmuhchhuah tawh 996 zingah naupang, kum 18 hnuailam hri kai hi 203 zet an awm tawh a, hei hi hri kai hmuhchhuah atanga chhutin za zela 20.38 a ni a, nimin thleng khan naupang hri kai enkawllai hi 21 la awmin hri kai zingah 182 te chu enkawl dam an ni tawh a, naupang hri kai hmuhchhuah atanga za zela 89.65 te chu enkawl dam an ni tawh a ni. CMO Office-a thawktute chuan tunah hian naupang hri kai te hi a hrana chhinchhiahna siam zel a ni tawh tih sawiin, Serchhip-a Veng mal-a hri kai hmuhchhuah tamna hmunah te pawh hri kai zingah naupang engemaw zat an awm ve ziah thin thu sawiin, nimin a hri kai hmuhchhuah zingah pawh naupang hi 3 an tel leh a ni.

Hetianga hri kai zinga naupang an tam zel avang leh hri leng thawh thumna ah naupang in an tuar nasa thei dawn nia a lan avangin sawrkar chuan naupang hri kai te enkawlna tur hian kawng hrang hrangin hma a la mek a, khum 10 awm theihna tur naupang pual Dedicated COVID Health Centre (DCHC) DCHC chu Serchhip District Hospital-a TRAUMA Extension Building-ah ruahman niin hei hi peihfel thawkhat a ni tawh a, helai hmunah hian hri kai zinga naupai, nau hring mai turte pawh enkawl theih turin nau neihna Room (Labour Room) te pawh ruahman a ni bawk a, thawktu indaihlohna avangin thuneitu sang ah thawktu dil belh a nih bakah tunah hian hman mai theih turin Nursing Superintendent ruahmanna in Detailment pawh siam a ni tawh bawk a. Hei bakah hian helai hmunah hian ICU khum 4 leh HDU khum 8 te pawh la awm thei tura ruahman niin tunhnaia Serchhip-a rawn kal Health Minister Dr R. Lalthangliana chuan inbuatsaihna te enfiah turin mithiam rawn tirh an nih tur thu a lo sawi tawh bawk a ni.

Hei bakah hian Serchhip-a Nursing School CCC-ah pawh COVID-19 hri kai naupang te enkawlna tur pawh hi ruahman tura hmalak a ni bawk a, helai hmun pawh hi thuneitute chuan enfiah tawhin, Nursing School Hostel tura sak-a chhawng khat chu naupang hri kai zingah taksa a natna hri lanchhuahna neilo te chu a tul angin helai hmunah hian enkawl theih tura ruahman a ni tih thawktute chuan an sawi bawk.