BBBP Serchhip District hmalakna in Special Career Awareness Seminar neih a ni

Beti Bachao Beti Padhao (BBBP), Serchhip District hnuaia hmalakna pakhat atan nimin khan Govt. Serchhip College-ah ‘My Aim My Target Campaign’ Programme atangin hmeichhe zirlai naupangte tan Special Career Awareness Seminar buatsaih a ni.

Govt. Serchhip College Smart Classroom-a he hun hman hi Serchhip DC Lalmuansanga Ralte chuan khuallian nia hmanpuiin kan thalaiten zirlai naupang an nih lai atanga tum fel tak neia lehkha an zir a tangkai thu sawiin, hnathawh tum thlan fel sa neiha chumi pana theihtawp chhuah kal chu a kawng a tawiin a hlawk ber a ni, a ti a. He Seminar chu hlawk taka hman ngei tum turin he huna tel hmeichhe zirlai naupang kalkhawmte a chah a ni.

He hun kaihruaitu Serchhip DIPRO K. Saitluanga chuan Beti Bachao Beti Padhao (BBBP) kalpui mek chungchang hi sawifiahin, Beti Bachao Beti Padhao hmalakna hian hmeichhia te venhim leh zirna lama tihhmasawn chu a tum ber a nih angin Serchhip District-ah kawng hrang hranga hmalak mek a ni tih a sawi a, ‘My Aim My Target Programme’ hnuaiah hian N. Vanlaiphai leh Thenzawl-ah ‘Meet the IAS programme’ kalpui tur a ni tih sawiin, nimin-a Special Career Awareness Campaign ang hi Vawiin hian Govt. Higher Secondary School, Serchhip-ah neih leh a ni dawn tih sawiin, Cable TV lamah pawh Talk Show nizan khan buatsaih a nih tur thu a sawi a. Seminar-a tel naupangte chu an hna thawh chak thlan tir nghal zel an ni ang a, karleh lamah an hna thlan thawk mektute nena inkawmna hun a hrana buatsaih sak leh vek an ni ang, tiin BBBP My Aim My Target an kalpui dan tur a sawifiah a ni.

Nimin-a he hun hman hi Govt. Serchhip College Principal, PC. Lalremsiama pawhin hmanpuiin hmeichhe zirlai naupangte puala Special Career Awareness Seminar buatsaih a ni chu lawmawm a tih thu leh, a buatsaihtu BBBP Serchhip District chungah lawmthu a sawi a. Serchhip SDO (Sadar) C. Laltleipuii chuan lawmthu sawina hun a hmang bawk a ni.

‘My Aim My Target Campaign’ ah hian Resource Person atan Lalhruaitluanga, Founder, ZO Career Solution leh C. Lalhriatpuia, MD Hillsgate te hman niin anni hian College zirlai naupangte tana duhthlan theih sawrkar leh Company a hna chi hrang hrangte leh a luh dante, mahni-a eizawnna din tura inbuatsaih dan te, College zawh hnua zirna sang zawk lut tura tih tur hrang hrangte zirtirna an nei a ni.