Lok Sabha MP in tunhnaia ramri-a inkahna a tlawh

Mizoram Lok Sabha MP, C. Lalrosanga chuan tunhnaia Assam leh Mizoram Police te inkahna hmun leh Saihapui V te chu nimin khan a tlawh.

Heng hmun a tlawhna ah hian Lok Sabha MP chuan Assam nena inkah lai khan New Delhi-ah Parliament Session neia a awm lai a ni tih sawiin, Session zawh veleh rawn chhoin, Assam nena inkah atanga thla khat tlinna ni chiahah inkahna hmun a rawn tlawh thei chu lawmawm a tih thu a sawi a. Ramri hi muanawm taka chinfel thuai a tul thu leh amah ngei pawhin ramri chungchang hi sawrkar laipuiah pawh a lo thlen ve tawh thin thu leh hemi kawnga sawrkar hmalak mekna te lawmawm a tih thu sawiin, hei aia chak zawk pawhin hma a la zel ang tih a rin thu a sawi bawk.

Ramri venhimna kawnga a bulhnai mipuite inpekna hi theihnghilh a ni tawh ngai lo ang tih pawh Lok Sabha MP chuan sawiin, ramri dep a awm Vairengte leh khaw hranga cheng mipuite an fakawmin, ram chhan nana an inpekna, huaisenna leh an tha thawh dan zawng zawngte a ropuiin a entawntlak takzet a ni, a ti a. Ramri-a Police duty-te pawh an fakawmin an chhuanawm hle a, ram tana an inpekna a ropui hle a ni, a ti bawk.