Latest News

MPCC in Tuirini Small Hydel Project hnawl chhan dik tak puan an phut

Mizoram Pradesh Congress Committee (MPCC) chuan Congress sawrkar hunlaia buaipui tan tawh Tuirini Small Hydel Project chu chhunzawm ngei turin sawrkar an phut tih sawiin, he Project siamna tur hnawl a nih chhan dik tak puan an phut thu an sawi.

Inrinni kalta a Aizawl Press Club-a thuthar thehdarhtute an kawmna ah MPCC General Secretary Joseph Lalhimpuia chuan Tuirini SHP hi siam ni ta se, Power a siam chhuah zawng zawng (100%) chu Mizoram ta tur a nih avangin nasa takin kawlphetha (power)-ah kan intodelh theih phah dawn tih a sawi a. “RTI chhanna atanga a lan danin he Project atana senso tur pawh December ni 4, 2019 khan BRICS New Development Bank Board of Director Meeting Shanghai a neih chuan a pawm fel a. BRICS NDB hian Tuirini project min pawmsak hnuah Technical Studies senso atan a thlawn liau liauin US $3,00,000 (cheng vbc. 2.2 chuang) min pek a remti nghal bawk a ni,” a ti.

Tuirini SHP min phalsak dan hi Mizoram tan a tha hle nia sawiin, “A project pumpui hi cheng vbc. 465 senna tur a ni a, heta senso zaa 80 hi BRICS in 1.25% (per annum) pung a min pek tur niin, 20% chauh hi State sawrkar tum ve tur a ni a. Loan rulh hun pawh Mizoram tana tha ber tura min ruahman sakin, Tuirini SHP Commission hnu atang chauha rulh tur a ni nghe nghe,” a ti a. He project atan hian Congress sawrkar hunlai atanga bul tanin thil tul ang ang buaipui zoin, sawrkar laipui pawhin a pawm thlap tawh thu a sawi a, “Kum 2019 Independence Day khan Chief Minister Pu Zoramthanga pawhin ‘Sawrkar laipuiin cheng vbc. 465 senna tur 24 MW Tuirini Hydel Project min pawmpui tawhin, thil pawimawh tihfel ngai la awm te tih zawh a nih veleh hna thawh tan a ni ang,’ tiin a lo sawi tawh bawk,” a ti a. RTI chhanna atangin he project hi hnawl a nih loh nan P&E Department lam pawhin theihtawp chhuahin, CMO-ah file vawi khat aia tam an kal tir tih a lang tih a sawi a, “Mizoram mipuiten Power hnianghnar zawk kan neih theihna tura sawrkarin ruahmanna tha a siam a, mantang eitu awm lova Tuirini Hydel Project hi a hlawhtlin ngei theihna tura Mizoram tana ngaihtuahna nasa zawk seng nawn leh turin MNF sawrkar kan ngen a ni,” an ti bawk.

MPCC thupuangtu Dr. Lallianchhunga chuan tunhnaia Power Minister thusawi chuan mipuite a tham lo hle nia an party in a hriat thu sawiin, “July leh August thla a pek tur Electric Bill hi a hma thla 3 chhung Bill ni a ngaih chawhrual (average) in, meter en miah lovin, rinthu tak meuhin sawrkarin a siam a. Bill hi rinthu a an siam a nih miau avangin a dik lo nasa hle a. Sawrkar in COVID-19 avanga meter en theih a nih loh thu sawi mahse, PHE Department erawh chuan Tui Bill meter an en thei reng,” tiin sawrkarin chhuanlam a siam chu mipui tan pawm theih a ni lo tih a sawi bawk.

Comments

Chhiar Hlawhte