Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Mizoram-ah hri kai thar 440 leh dam 358 an awm

Pathianni khan Mizoram-ah Sample 1948 enfiah niin heng atang hian COVID-19 hri kai 440 hmuhchhuah an ni a, hri kai hmuhchhuah zat hi tlem deuh mah se Sample enfiah atanga za zela 22.59 te chuan hri an kai thung a ni.

Pathianni khan ZMC-a RT-PCR Laboratory-ah Sample enfiah awm lovin Fluorescent Immunoassay (FIA) Test hmanga Sample en a awm lo bawk a, District hrang hranga TrueNat Laboratory 11 awm te zingah Laboratory 4 atangin Sample 60 enfiah niin hri kai mi 17 hmuh an ni a, an zinga mi 14 te hi Mamit District ami te niin Chuhvel khua ah 11 leh Kawrthah khua ah mi 3 te an ni a. Aizawl District-ah hri kai mi 3 hmuh niin Ramhlun North vek an ni bawk.

District hrang hrang 11 zinga District 8-ah Pathianni khan Rapid Antigen Test hmangin Sample 1888 enfiah ni bawkin heng atang hian hri kai 423 hmuhchhuah an ni bawk a, an zinga mi 307 te chun Aizawl District-a hri kai hmuhchhuah an ni a, Aizawl District-ah hian Bawngkawn chu hri kai hmuhchhuah tamna ni lehin mi 23 zet hmuhchhuah an ni a, Bethlehem Vengthlang-ah 21 leh Vaivakawn-ah 15 hmuhchhuah niin midangte hi Veng leh khua 58 ami te an ni. Heng bakah hian Mamit District-ah hri kai mi 60 hmuh niin an zinga 38 te chu Khawhnai khua an ni a, Kolasib District-ah hri kai mi 15 hmuh niin Khawzawl District-ah 14, Siaha District-ah 9, Champhai District-ah 8, Lunglei District-ah 6 leh Lawngtlai District-ah hri kai mi 4 hmuh an ni bawk.

Nimin khan Mizoram-a hri kai enkawl zingah mi 358 te chu hri lakah fihlimin anmahni enkawlna hmun atanga chhuahtir an ni a, heti hian nimin tlai dar 5:00 thlenga Mizoram-a hri kai hmuhchhuah chu 57,962 an ni ta a, an zinga 49,597 te chu enkawl dam ni tawhin hei hi hri kai hmuhchhuah atanga chhutin za zela 85.57 a ni a, tunah hian hri kai enkawllai 8151 an la awm mek a ni.

Nizan hmasa dar 10:00 khan Zoramchhani (68), Tuikual South chu ZMC-ah COVID-19 vanga boralin nimin zing dar 8:20 khan Lalhliappuii (79), Hunthar Veng chu a boral ve leh bawk a, heti hian Mizoram a hri kai zingah mi 214 an boral ta a ni.

Comments

Popular News (Last 30 Days)