Hripui leng vanga inkharkhip kalpui chungin kumin ah Chhiah hmuh tlahniam lutuk lo

Hripui leng vanga Total Lockdown puanna hnuaiah Mizoram sawrkar-a Taxation Department Chhiah hmuh chu a tlakhniam phah lutuk lo a, kum kal mek 2021-22 (April-July) chhungin Chhiah chi hrang hrang Rs. 2,71,62,77,977/- an hmu tawh a, hetihlai hian kum kalta (2020-21) April-July a chhiah hmuh chu Rs. 1,66,11,86,314/- a ni.

Commissioner of State Tax Kailiana Ralte chuan chhiah lak kawngah a theih ang angin tan an la tih sawiin, Tax Return File lo te reminder pein, Office lamah pawh an puih bakah, Tax Return File lo te an dapchhuak reng niin a sawi a. Taxation Department chuan kum kal mek, April thla ah Rs. 93,04,70,699/- Chhiah hmuin, May thla ah Rs. 32,94,31,107/-, June thla ah Rs. 75,71,16,919/- leh July thla ah Rs. 69,92,59,252/- an hmu a, kumin 2021-22 a chhiah hmuh tur ruahman lawk zat chu Rs. 6,50,00,00,000/- a ni.

Kum kal ta 2020-21 ah khan chhiah hmuh tura Taxation Department in a ruahman zat chu Rs. 6,00,00,00,000/- a ni a, hmuh zawng zawng erawh Rs. 6,77,83,53,824/- niin, target khumna Rs.77,83,53,824/- a tling a. Kum 2019-20 chhung khan Rs.6,67,28,72,503/- an lo hmu tawh bawk a ni.

Kum kalta chhung khan COVID-19 hripui leng vanga harsatna hrang hrang thleng vangin Taxation Department in Chhiah a hmuh thin ang te a hmu pha lo a, nikum April thla ah phei chuan Rs.14,35,16,224/- chiah an hmu pha a, kumin April-a an hmuh erawh Rs. 93,04,70,699/- a tling thung a ni.

Kum 2020-21 April atanga July thlenga Taxation Department in Chhiah a hmuh Rs. 1,66,11,86,314/- chu kumin April atanga July thleng a chhiah hmuh Rs. 2,71,62,77,977/- aiin Rs. 1,05,50,91,632/- in a tlem zawk thung a ni.