Mizoram-ah hri kai hmuhchhuah pung hret hret

Mizoram-ah ni khat-a hri kai hmuhchhuah an pung chho leh mek a, niminpiah khan Mizoram-ah Sample 8388 enfiah niin heng atang hian COVID-19 hri kai 794 hmuhchhuah leh an ni a, Sample enfiah te atanga za zela 9.47 te chuan hri an kai a ni.

Niminpiah khan ZMC-a RT-PCR Laboratory-ah Sample 1250 enfiah niin heng te hi Aizawl leh Lunglei District atanga Sample lak te an ni a, heng atang hian hri kai 151 hmuhchhuah niin Aizawl District-ah 127 leh Lunglei District-ah 24 te an ni. Aizawl District atanga hri kai hmuhchhuah te hi Veng leh khua 35 ami an ni a, Lunglei District atanga hri kai hmuhchhuah te hi Lunglei khawpui chhung ami te vek an ni bawk. Niminpiah khan Fluorescent Immunoassay (FIA) Test hmangin Sample enfiah a awmlo thung a ni.

District hrang hranga TrueNat Laboratory-ah niminpiah khan Sample 303 enfiah ni bawkin heng atang hian hri kai 44 hmuhchhuah an ni a, an zinga 21 te chu Champhai District ami niin an vai hian Champhai Electric Veng ami te vek an ni a. Lawngtlai District-ah hri kai mi 11 hmuh niin Mamit District-ah 5, Serchip District-ah 3, Hnahthial District-ah 2 leh Aizawl leh Khawzawl District-ah pakhat ve ve hmuh an ni bawk.

Niminpiah khan Rapid Antigen Test hmangin Mizoram hmun hrang hrangah Sample 6835 enfiah ni bawkin heng atang hian hri kai 599 hmuh leh an ni bawk a, an zinga 300 te chu Aizawl District-a hri kai hmuhchhuah te niin Bethlehem Vengthlang-ah hri kai mi 25 lai hmuh leh an ni a, Bawngkawn leh Zemabawk-ah 15 ve ve hmuh ni bawkin a dang hi Veng leh khua 73 atanga hri kai hmuhchhuah te an ni. Heng bakah hian Kolasib District-ah hri kai 84 hmuh ni bawkin Lunglei District-ah 61, Lawngtlai District-ah 60, Champhai District-ah 37, Siaha District-ah 20, Mamit District-ah 18, Hnahthial District-ah 10, Serchhip District-ah 7 leh Saitual District-ah hri kai mi 2 te hmuh an ni bawk.

Nimin khan Mizoram-a hri kai enkawl mi 354 te chu hri lakah fihlimin anmahni enkawlna hmun atanga chhuahtir an ni ve leh a. Heti hian nimin tlai dar 5:00 thlenga Mizoram-a hri kai hmuhchhuah chu 54,851 niin heng zinga 47,921 te chu enkawl dam ni tawhin hei hi hri kai hmuhchhuah atangin zaa 87.36 a ni a, tunah hian hri kai enkawllai 6728 an la awm mek a ni. Nimin khan tlai dar 5:00 thlengin Mizoram-a hri kai zingah nunna chan an awm belh lova, Mizoram-a hri kai zingah boral chu mi 202 an ni tawh a ni.

West Tuipui bialtu MLA in hri a kai :

West Tuipui bialtu MLA, Nihar Kanti Chakma chuan COVID-19 a kai tih nimin khan hmuhchhuah a ni tih sawrkar chuan a puang a, amah bakah hian a nupui leh a fanu bakah an chenpui pakhat chuan hri a kai tih hmuhchhuah a ni bawk.