Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

P&E Minister hova Electric Bill sawihona neiin Bill complaint theih hun chhung pawhsei a ni

Power & Electricity Department changtu Minister, R. Lalzirliana hovin nimin khan Electric Bill chungchang sawihona neih a ni a, Electric Bill chungchanga lungawilohna neite tan Bill complaint period chu pawhsei remtih a ni.

SAW Conference Hall-a Electric Bill chungchang sawihona neih ah hian Mizoram Consumers’ Union, MIMA, Central YMA, MJA, MUP leh MHIP aiawh ten Electric Bill chungchanga mipui harsatna hrang hrang an sawi te ngaihthlak niin hriatthiam loh laite inhrilhfiahna hun hman a ni a. He hunah hian P&E Minister R. Lalzirliana chuan sawrkar hian kum kalta kha khan cheng 163 chu mipui te chan ti rit lo turin Electric Power man hi a tlawm zawkin (subsidized rate) pek a ni tih sawiin, nikum December khan COVID-19 harsatna-ah pawh hian sawrkar chuan cheng vbc. 7 chu mipuite harsatna sukiangin a lo peksak tawh tih a sawi bawk.

P&E Minister chuan kumin ah erawh COVID-19 a lo hluar bakah inkhuahkhirh te a lo ngai leh tih sawiin, chutih laiin Electric Bill thla tin pek a ngai a, thla khatah cheng vbc. 26 bawr vel pek a ngai a, chu chu kumdang anga Central atanga sum kan beisei, kan hmuh regular lutuk loh avangin pek hleih theih a ni lo tih a sawi a, theih ang tawkin Finance lam pawh nasa taka an biak thin thu leh sum dahkhah a nih loh chuan Power chhit tur hi Power leina ten an cut sak theih thu a sawi bawk. P&E Minister chuan Tariff a san dawn hian Public Notice JERC lamin an chhuah thin thu pawh sawiin, Mizoram chu North East-ah tariff san loh berna State a nih thu a sawi bawk.

He thutkhawm a tel te hian hripui leng avanga Metre Reading neih dawna harsatna a awm loh nan Dan angin Metre Box te In pawn-ah dah zel ni thei se, Metre Reader ai kal la an awm a nih chuan sawrkar hotuten ennawn se, damlohna vang leh harsatna bik nei te an awm a nih chuan an aiawh turin hotuten a thiam an ngaihtuah ang an ti a. Bill Complaint Period pawh August 31, 2021 thleng pawhsei nise tiin, Aizawl khawpui chunga Bill Complain-na hmun pasarih (7) awm mek chu, Covid laka kan him tlan nan hmun thawveng tha deuhah siam belh nise an ti bawk. Hei bakah hian Thla thum chung Bill lo kal pek harsatna nei te chuan a thla khat te te an pek theihna tur ngaihtuah nise an ti a, amaherawh chu Electric Bill sanna Tariff erawh tih danglam theih a nih loh thu tarlan a ni bawk.

He huna tarlan a nih danin Aizawl khawpui chhunga February atanga May thla bill pe hi chawlhrualin 81.42% a nih laiin, June leh July thla bill pe erawh chawhrualin 52.01% a ni a. June atanga July thla-a bill pe tlemna zat hi 23,572 zet a ni.

Comments

Chhiar Hlawhte