Mizoram tana Mulberry Sericulture project leh Mega Project on Eri culture approve sak turin CSB ngen

Bangalore-a hmunpui nei, Central Silk Board (CSB) chu nimin khan Mizoram sawrkar-a MLA L. Thangmawia chuan tlawhin Central Silk Board Office-a inchiah mek, Mulberry Sericulture Project atana cheng vbc. 10.67 leh Mega Project on Eri culture chhungkaw 3000 tana project thehluh te pawh a rang lama approve sak turin a ngen.

Sericulture Minister Dr. K.Beichhua remruatna anga Central Silk Board (CSB) tlawhtu L. Thangmawia MLA hi CSB Member Secretary & CEO Rajit Ranjan Okhandier IFS leh CSB Consultant Moncy Issaac, Joint Secetary (Rtd.) te chuan lo dawngsawngin Dr. Lalthlamuana Pachuau, Scientist D chu CSB atanga deputation-a Mizoram sawrkara kal an phalsak avang te, Eri Silk Project chhungkaw 400 tana cheng vbc. 15.73 atanga kumin March thla a cheng vbc. 7.924 an release sak avang te, chhungkaw 350 tana Eri Culture-a cheng vbc. 14.87 an approved sak tawh avangte in lawmthu a hrilh a. Tuna Central Silk Board Office-a inchiah mek, Mulberry Sericulture Project atana cheng vbc. 10.67 leh Mega Project on Eri culture chhungkaw 3000 tana project thehluh te pawh a rang lama approve sak turin a ngen nghal bawk a. CSB hian Mizoram lam nasa zawka rawn hawi a, Mizoram sawrkarin rawtna a thlen bak pawh hmalakna thar neihna atan a bik taka Mizoram rawn focus turin a ngen bawk.

HRD Board Vice Chairman ni bawk L. Thangmawia chuan Mizoram chhung hmun hrang hranga kuthnathawktu engemaw zat ten hlawhtling taka Pangang chi hrang chi 4 khawi hna an kalpui thu sawiin, Muga Pangang khawi phei chu sik leh sa inthlak avanga North East State danga harsatna an tawh thu te, tunah chuan Mizoram chauhva kalpui tura ruahmanna siam a tul thu te a sawi a. Mizoram sawrkar rawtnate CSB-in a tihlawhtling thei a nih chuan Mizote mil eizawnna, hlawhtling taka kalpui theih, India ram tan pawh chhenfakawm khawp hlawhtlinna Mizoram-ah a thlen theih thu a sawi a ni.

CSB Member Secretary Rajit Ranjan Okhandier chuan Mizoram chu Silk pangang khawi nana duhthusam climate a neih avanga an theihna apianga pui tura an inpeih thu lo hrilhin, State sawrkar-in a tul anga rawn bawhzui apiang theihtawp an lo chhuahpui tur thu a lo hrilh a. Consultant Moncy-a pawhin State sawrkarin a tih ve turte tha taka a tih fel chuan theihtawpa lo bawhzui zel anih tur thu a sawi bawk a ni.