UPC te thubuai chinfel a ni

United Pentecostal Church (UPC) North East India leh Mizoram UPC te inkara kum 27 chhung zet thubuai awm chu tun thla ni 7 khan Supreme Court-ah chinfel a ni ta.

UPC North Mizoram District-a Pentecostal Network (PenNet) Editor chuan United Pentecostal Church of North East India leh Mizoram UPC te inkara thubuai, Gauhati High Court-in thuremna a tihchhuah chungchang a lungawi lova Mizoram UPC ten Supreme Court a Special Leave Petition (SLP) an thehluh chu ngaihtuahin September 7, 2022 khan Supreme Court chuan Mizoram UPC chu thiamloh chantirin, an SLP thehluh chu a hnawl (dismissed) sak ta tih a tarlang a. “Supreme Court chuan, ‘Mizoram UPC ten UPC NEI Kohhran-a an awmho laia an bungrua, Kohhran an chhuahsan tawh hnua an chuh hi a dik lo va, kum 1995-ah UPC NEI Kohhran hi an chhuahsan avangin kum 1995 leh a hma lama UPC Kohhran bungrua te hi UPC Mizoram te hian engmah chuh theihna (right) an nei lo,’ tia Gauhati High Court-in Judgment Order a siam chungchangah hian tih dik loh engmah a nei lova, chuvangin SLP an dilna hi pawm (entertain) theih a ni lova, hnawl (dismissed) a ni, tiin High Court thuremna hi a tungding ta a ni” a ti bawk.

Hetiang a lo nih takah chuan UPC Kohhran an buai avanga Biak In leh bungraw chi hrang hrang Mizoram UPC lam kuta la awmte chu UPC NEI lam kuta an hlan vek a ngai dawn ta nia tarlang bawkin, High Court Order chu a din-chan zui tak avangin Deputy Commissioner, Aizawl-ah an Biak In kharsak te chu an kuta hlan turin ngenna an thehlut bawk a. UPC NEI ten DC hnena Biak In khar an kut-a hlan tura an tih te chu -  Bungkawn Biak In, Tuikual North Biak In, Ramhlun South Biak In, Durtlang M-5 Biak In, Govt. Complex Biak In leh Chawlhhmun Biak In te a ni.

Comments

Popular posts from this blog

Volleyball S/F khel dawn