Dengue laka inven kawngah tanlak tul ti

Directorate of Health Services chuan tunhnaia Mizorama Dengue natna a hluar mek chungchangah thuchhuah siamin natna pung chak tak anih avangin inven kawngah tan lak zual a tul hle a ni, a ti.

An thuchhuah an tarlan danin, Dengue hi natna chi khat virus in a thlen a ni a, he natna hrik hi Thosi in a pudarh thin a, chuvangin Thosi seh atanga inkaichhawn theih a ni. Dengue natna thehdarhtu Thosi hi Mizoten ‘Thosi rang’ an tih mai chi a ni a. Aedes Thosi te hian vawi khat Dengue hrik a pai tawh chuan a damchhungin a pai reng a, a seh apiang ten Dengue natna an kai thin a. Malaria thlentu Thosi te anglo takin Aedes Thosi te hian chhun khaw en laiin mi an seh deuh ber thin a ni.

Aedes Thosi in mihring a seh atanga ni 5 - 6 chhungin natna a langchhuak thin a, Dengue lanchhuah dan te chu Khawsik sang tak, Lu leh chalbawr na, mitmu na leh khaw eng-a mit men harsa, ruh leh tihrawl na, taksa a bawl/vual sen awm te an ni. Heng bakah hian hnar, ka leh ha hni atanga thichhuak, luak, pumna tak leh nak dinglam na te an awm bawk a, Dengue Fever hi natna dangte ang loin enkawlna bik damdawi a awmlo a, a natna lanchhuah dan ang zela enkawlna pek tur a ni. 

Dengue nih leh nihloh finfiah theihna khawl ELISA hi Sentinel Surveillance Hospital (SSH); Aizawl Civil Hospital leh Lunglei Civil Hospital-ah te a awm a, SSH pan remchang ve theilo te tan District Hospital, PHC/CHC/SDH/UPHC tin ah hian thisen sample lain SSH a exam turin an thawn sak thei a ni.