Serchhip-a END ten Rakzu an man sa an tichhia

Serchhip-a Excise and Narcotics Department chuan kumin chhunga Rakzu an man litre 800 chuang chu nimin khan an tichhia.
Heng Rakzu tihchhiat tak te hi kumin chho-a an man te niin Court lama tihfel ngai ang te tihfel a nih hnuah nimin chawhnu lam khan Serchhip P&E Veng-a Leisekawt Mual sir-ah an leihbua a, a vaiin litre 870 niin he hunah hian Excise and Narcotics Department-a thawktute leh tualchhung-a thuthar thehdarhtute an tel a, heng Rakzu tihchhiat tak tak te hi a tlangpuiin khawdang atanga Serchhip District-a zawrh tura rawn lakluh tum te an ni a, thenkhat hi a neitu hriat loh te an ni.

Excise and Narcotics Department Serchhip-a Asst. Commissioner B. Ngurchhuana chuan an Department thawktute thahnem ngaihna a Rakzu leh Damdawi man a ni thin chu lawmawm a tih thu sawiin, tunhnaiah District pawnlam atanga Rakzu rawn lut a tam thu a sawi a. Tuna an tihral tam ber te pawh District pawn atanga rawn lut an lo man te a ni tih sawiin, Serchhip atanga Rakzu siamchhuah a tam lutuk lo niin a sawi bawk.


END-a Asst. Commissioner chuan Serchhip-ah Heroin No. 4 a hluar hle tih pawh sawiin, a dona kawngah kan tanrual a tul thu a sawi a. Ruihhlo ti thin ten sim leh an harsat avangin a la inhnamhnawih lo te venhimna lamah tan lak nasat zual a tul thu leh an Department pawhin an theih ang anga hma an lak thu a sawi bawk.

Serchhip-a Excise and Narcotics Department hian kumin January ni 1 atanga tun thla ni 26 (niminpiah) thleng khan ND&PS Act hnuaiah Heroin No. 4  kg. 2.422 manin Ganja kg. 8.118 an man a, thubuai 44 ziaklutin mi 55 an man bawk. Hemi hun chhung vek hian MLP Act hnuaiah Rakzu litre 7304.82 manin Sapzu (IMFL) um 312 an man a, heng bakah hian Beer case 42 leh cane 9 an man bawk a, thubuai 200 ziaklut tawhin mi 183 an man tawh bawk a ni.

Comments

Popular posts from this blog

Tukverh-a tlasual boral