Larsap in Medhavi Foundation Centre a tlawh

/

Aizawl Bawngkawn South-a awm, thalaite tana Skill Development Training hmun, Medhavi Foundation Centre chu nimin khan Mizoram Larsap Dr. Haribabu Kambhampati chuan a tlawh.

Nimin-a helai hmun a tlawhna ah hian Larsap Dr. Haribabu Kambhampati chuan Medhavi Foundation Centre a tlawhna chhan te sawiin, training hrang hrang an kalpui leh an kalpui dante, an Centre atanga training zo ten hna an hmuh dante hriat te, training hmang tangkai a mahnia eizawnna bultan awmte dinhmun te a hriat duh avanga kal a nih thu a sawi a. Skill Development chungchang sawiin Larsap chuan, training te chu a tih thei mai a, mahse a pawimawh ber chu training zo ten hna an hmuh emaw, mahni kutke a dinga eizawnna bultanna emaw an neih a nih thu sawiin, hei hi Sawrkar Laipui Scheme Pradhan Mantri Kaushal Vikas Yojana (PMKVY) in a tum ber pawh a nih thu a sawi a. Service Sector-ah abik takin phaia Hotel leh Damdawi In-ah te Mizo thalai hnathawk an tam nia a hriat thu sawiin, heng Sector-ah te hian Mizo leh Hmarchhak State dang thalai te chawr nuam an ti a, hna a awm reng a, mahse hemi atan mahni inlum kalsana hmundanga awm an inkau a ngai niin a sawi bawk.

He hunah hian Larsap chuan he Centre hnuaia Deendayal Antyodaya Yojana-National Urban Livelihoods Mission (DAY NULM) kaltlanga ei leh in siam course ‘Commis Chef’ zo thalai 24 te hnenah Certificate a hlan a, Larsap chuan Commis Chef course zo thalai hi kawmin an kal zel dan turte a zawt a. Larsap hi Lalramsanga Sailo, Secretary, Labour, Employment, Skill Development & Entrepreneurship chuan tawiawmin hun a hmanpui bawk a ni.

Larsap in he Centre a tlawhna hunah hian Medhavi Foundation-a Director leh Pro Chancellor Medhavi Skills University Sikkim Kuldip Sharma chuan an Foundation leh an University in Skill Development lama hma an lak dan, hemi kawnga Industry te nena an thawhho dan tlangpuite a sawi a. Vanlalkima, Centre Manager, Medhavi Foundation Aizawl in Mizoram Skill Development Training hrang hrang an lo buatsaih tawh te leh an chanchin tlangpui a sawi bawk a ni.

Medhavi Foundation hian kum 2019 khan Mizoram-a Skill Development zirna leh training te buaipuiin Mizo thalai 800 chuang Skill Development training an pe tawh a, heng zinga tam tak chu Mizoram leh Mizoram pawnah te hna an hmuhsak a ni. Medhavi Foundation Centre Aizawl hi Mizorama Pradhan Mantri Kaushal Kendra (PMKK) Centre puitling awmchhun niin Hmarchhak ah hetiang Centre hi 11 an nei mek a, Sikkim-ah Medhavi Skills University hming chawiin University an din bawk a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »