Mizoram Information Commission (MIC) chuan RTI Act, 2005 Section 4(1)(b) zawm chungchang sawiho turin nimin khan Public Authorities 10 te chu Mizoram Information Commission Office-ah a thawh thumna atan an ko a, Vawiin hian Department dang 10 te koh leh an ni ang.
RTI Act, 2005 Section 4(1)(b) in a phut angin sawrkar Department te chu an website-ah RTI hmanga dil ngai lova pholan theih - DAA leh SPIO te biakpawh theihna Contact, Department Directory, Scheme leh Programme hrang hrang department in a kalpui te, Act/Rules/Regulations hrang hrang Department in a tihchhuah te, Department hnuaia beneficiary list te, Department budget dawn dan leh mipui tana tangkai tur information te dah tura tih a ni a. Hei hi Department tam takin an tihlawhtling tan a, la ti fel lo tlem azawng an la awm mek bawk a. RTI Act, 2005 Section 4(1)(b) chuan Public Authority/Sawrkar Department-te chu an hnathawhna chungchang mipuiin awlsam zawka an hriat theihna turin point 17 tarlangin, an Office website-ah dah ngei tura tih an ni. Hemi bawhzui nan hian Mizoram Information Commission (MIC) chuan kumin January 19 khan Order tichhuakin sawrkar Office hrang hranga Departmental Appellate Authority (DAA) leh State Public Information Officer (SPIO) te chu RTI Act, 2005 Section 4(1)(b) in a phut angin Suo Motu disclosure ti vek tur leh February 28, 2022 aia tlai lovah an hmalakna te Secretary, MIC hnena thehlut turin a lo hriattir tawh a ni.
Head of Department leh SPIO te chu RTI Act Section 4(1)(b) in a phut angin mipuiin zawh kher ngai lova an Department hmalakna leh an hnathawh chungchang an website ah dahchhuak ngei tura hriattir an ni a. Harsatna an neih pawhin inthlahrung lova Mizoram Information Commission be rawn turin an chah bawk a. An website-ah an dah ngei em tih Mizoram Information Commission chuan a endik zui zel dawn tih hriattir an ni bawk a ni. Hetihlai hian an hmalakna te tha taka tarlang Department engemaw zat an awm tih hriat a ni a, Mizoram Information Commission chuan an chungah lawmthu a sawi bawk a ni.
Comments
Post a Comment