Zokhawsang-a Assam Rifles hmun hawng turin Union Home Minister rawn kal a tum - Chief Minister

Chief Minister Zoramthanga chuan Zokhawsang ram-a Assam Rifles awmna hmun hawng turin Union Home Minister Amit Shah chuan November thla khian Mizoram rawn tlawh a tum tih a sawi a. Heng bakah hian Mizoram mamawh hrang hrang sawrkar laipui-a Minister te a sawipui thu a sawi bawk.

Mizoram thil pawimawh hrang hrang buaipuia New Delhi-a zin Chief Minister Zoramthanga hian Inrinni khan Aizawl rawn thlengin chawhnu lamah thuthar thehdarhtute a kawm nghal a, Chief Minister’s Conference Hall-a thuthar thehdarhtute a kawmna ah hian Chief Minister chuan Zokhawsang-a Assam Rifles awmna tur chu sak zawh tawh a ni tih Union Home Minister chu a hrilh tih sawiin, an awmna hmun thar hi hawng turin a sawm niin a sawi a. Home Minister pawhin lo rem tiin a phur hle tih a sawi a, a hun leh ni tur tak erawh la hriattir leh tur niin a sawi a. Hetia Assam Rifles te awmna tur hawn a nih chuan an luah zui nghal mai turah an ngai tih a sawi bawk.

Chief Minister chuan tunhnaia Delhi a zin tumin India President, Prime Minister leh mi pawimawh hrang hrang a hmuhna ah Burma ram buai chinfel chungchang a sawi tih a sawi bawk a. “Myanmar ram buaina ching fel tur hian India sawrkar tanpuina hi a pawimawh ber leh kawng awmchhun a ni a. India sawrkar chu pa chan changa bul tanpui turin ka ngen a. Mi pawimawh ka hmuh te hian an lo ngai pawimawh vek a ni,” a ti.

Zawh belhna chhangin Chief Minister chuan, “Myanmar a hel pawl hrang hrangte hian democracy hi an tum ber a ni lo a, Federal Government-ah an lungawi vek a. Tuna an buaina chinfel nan khian sipai sawrkar leh Hnam hrang hrang hel pawl (Ethnic Arm Group) te khian inremna an neih theih chuan NUG pawhin a pawm niin a lang a. Chuvangin, remna neih theih niin ka hria a ni,” a ti bawk.

Chief Minister chuan Union Health Minister Mansukh Mandaviya hnenah Zoram Medical College (ZMC) chu sawrkar laipui enkawl turin a thlen tih a sawi a. “Mizoram sawrkar enkawl a nih chuan sum leh pai-ah kan harsat bakah thawktu tha leh thiam kan nei thei lo a. Central enkawl anih chuan mi thiamte pawhin thawh an châk zawk dawn a, chuvangin min laksak turin kan ngen a. Union Minister hian a hlawhtlin ngei theih nan theihtawpa hmalak a tum thu min hrilh a ni,” a ti a. Zemabawk-a Cancer Damdawi In-a khawl leina tur cheng vbc. 10 chu a pek tur thu a sawi nghal niin a sawi bawk.

Union HRD Minister hnenah Lunglei a Mizoram University (MZU) Southern Campus dah chungchang a sawipui tih pawh Chief Minister chuan sawiin, Minister hian a hlawhtlin nan theihtawpa hmalak pui a tum niin a sawi a. Asian Development Bank (ADB) hotute a kawmna ah Health Care sum atan vbc. 1000 an dil leh sawrkar laipui pawhin an remtih vek tawh chu pechhuak rang turin a ngen niin a sawi a. He sum hi central in vbc. 780 an rulh tur anih thu leh Mizoram sawrkar rulh tur chu vbc. 280 anih thu a sawi bawk.

Chief Minister Zoramthanga chuan Assam Chief Minister nen an inkawm tih pawh sawiin, ramri buai chinfelna tura Minister te leh Official te hma lo lakna chu lawmawm an tih thu an sawi a. “Inremna siam ngei tura inbiakna hi neih zui zel nise, a tul angin Chief Minister pawh inhmuh zel ni se kan ti a. Kuhva chungchangah dan lova Myanmar atanga kuhva ro lo lut te chu dan chhunzawm zel nise, chutih laiin tualchhung tharchhuah kuhva chu a hralh leh phurh velah harsatna awm lo se tiin kan sawi a ni,” a ti. 

Chief Minister chuan MNF Returnee te Insak tanpuina pawh Prime Minister leh Minister dangte bulah a sawipui thu leh Union Finance Minister Nirmala Sitharaman-i’n nakum 2023-24 ah Special Assistance to States for Capital Investment (SASCI) ruahman a nih leh tur thu a lo hrilh thu pawh  sawi bawk.

Comments

Popular posts from this blog

Tukverh-a tlasual boral