Lunglei District-a kawng laih enfiah leh a ni

Lunglei District chhunga Environment humhalh kawnga Dan hrang hrangte zawm anih theihna tura hmalatu leh thuneitu ‘Lunglei District Monitoring Committee on Compliance of Environmental Laws’ chuan Inrinni khan an Chairman leh District Bawrhsap Kulothungan A hovin NH-54-a hnathawh mek tlawhin leivung an paih dan, Ppoil Bank an neih zat te leh leivung dalna Gabion Wall leh Protective Wall an neih leh neihloh te a hmunah an enfiah a.

Tun tumah hian NH-54 Package V (Dawn to Thualthu) enfiah niin Hrangchalkawn, Theiriat, Thaizawl, Bualte, Thualthu, Lungpuizawl, Zobawk leh Dawn te an tlawh a ni. Helai hnathawktu contractor ABCI Hrangchalkawn Project Manager Amarjit Singhsawi danin Package V hnuaiah hian leivung paihna hmun tura ruat (designated spoil bank) 25 awmin heng zinga 15-ah leivung daltu Gabion Wall leh Protective Wall-te siam tawh niin tun dinhmunah leivung daltu gabion/protective wall hmun thum (3) ah siam leh mek a ni a, hmun sarih (7) ah hmalak ala ni lo a ni. Heng Spoil bank 25 zingah hian tun dinhmuna hman mek lai chu pasarih (7) a nih thu a report bawk.

Lunglei District chhunga hnathawh NH-54 (Package 3, 4, 5, 6) leh NH-302 (Package A&B) ah a vaiin leivung paihna hmun tura ruat (designated spoil bank) 85 a awm a, tun tum hi verification an neih tum thumna (3-na) niin July ni 28, 2022 khan NH. 54A leh NH 302 ah verification neih a ni a. September ni 6, 2022 khan NH. 54 Package VI - Tawipui North-I leh II, Tawipui South leh Thingfal-ah te verification an nei bawk a ni.