Gas connection chungchanga i hriat ngei ngei tur

Consumer te i harh ang u -XXXVII :

Gas connection chungchanga
i hriat ngei ngei tur

- Laldinpuia,

Secretary 

Serchhip District Consumer Association

Tunlai khawvelah chuan eirawngbawlna Gas hi mitin mamawh a ni deuh ber tawh a, khawpui chauh lo thingtlangah pawh eirawngbawlna Gas hi an hmang nasa tawh hle a, thingtlang a thuk a thing tuah hmanga eirawng bawl thin te pawhin Gas Agency te thlen phakna khuaah chuan Gas connection hi an nei tel deuh zel tawh a ni. Hetiang anih lai hian Gas Connection kan neih danah hian Agency lam hian Connection fee an lak danah hian diklo deuh leh rualkhai lo deuh a awm thin niin a lang a, Agency fel tak tak leh mipuite hmakhua ngai tak tak an awm laiin Dan piah lama mipui te sum laksak duhtu hi an awm ve reng a. Hemi kawngah hian mipui te kan fimkhur a, thil kan chik peih a ngai hle a ni. LPG inkaihhruaina danah engtin nge a inziah tih te? Connection fee tur dik tak hi engzah nge ni tih te, Gas connection kan tih hian enge a ken tel ngei ngei tur tih te hi kan hriat ve a tul hle a ni. Dan leh a kalhmang kan hriat tawkloh avangin Gas connection kan tih naah tum aia tam sum kan seng a, kan mamawh vak lemloh thleng thlengin kan khul thin. Sawrkar/Company ina Gas connection ti thar turte tana chawi tur zat ruahmanna a siam hi hria ila, Gas connection man a sang kan tih fo hi thil awmdan kan hrefiah anga, connection a kan chawi zat dik tak leh connection ina a ken tel te kan hriatfiah phah ngei ang.

IOC website (Sept 2022) in a a tarlan danin Gas New connection rate chu hetiang hi a ni (Connection rate hi Gas connection kan neih tlanglawn deuh chauh tarlan a ni) -

1. a) Gas bur 14.2kg security deposit - Rs 2000/-

b) Gas bur 10kg composite security deposit - Rs 3350/-

c) Gas bur 5kg security deposit - Rs 1150/-

d) Gas bur 19kg Commercial - Rs 2400/-

2. Pressure Regulator - Rs 200/-

3. Mechanic visit charge (Hei hi Gas Stove Agent ami lei tan a ngailo, hmundang atanga stove kan lei erawh chuan a ngai thung) - Rs 236/-

4. Hose Pipe 1.5 meter - Rs 190/-

5. Visit &Administrative charge (Hei hi online a connection request tan leh showroom atanga connection la tan a ngai lo. Agent ten kan chenna ina min rawn kal chilh a connection min rawn pek erawh chuan a ngai thung). - Rs 118/-

6. Installation charge - Rs 118/-

7. Collection of equipment from consumer premises (Hei hi kan in a min rawn kalchilha kan document an rawn la anih loh chuan a ngai lo) - Rs 118/-

8. Domestic Card fee - Rs 59/-

Heng bakah hian sawrkar laipui ina free connection a pek Pradhan Mantri Ujjwala Yojana (PMUY) Scheme a free connection nei te tan hetiang hi chawi tur tlem a awm ve bawk.

1. Installation charge - Rs 75/-

2. Domestic Card charge - Rs 25/-

3. Mandatory inspection(Hei hi kan chenna ina connection an rawn dahin pek tur a ni a, kum 5 danah vawi 1 inspection hi an rawn nei thei. A charge hi a inang vek) - Rs 59/-

Heng kan tarlan tak te khi IOC website (https://cx.indianoil.in/webcenter/portal/Customer/pages_tariff-newconnection) ina Gas connection thar ti tur tana rate thar ber an tarlan a ni a. Khi ta tarlan bakah Agency lamin a min lei luih tir an tum thin Gas Stove, Apron, Solar light etc. te hi consumer ten kan mamawh lo emaw, kan duhlo emaw anih chuan Agency te hian min lei luihtir tur a ni lo. Gas connection in a a kentel IOC website in a tarlan bak khi chu kan duhlo anih chuan kan lei lo thei a, a man pawh kan chawi tur a ni lo. Agency ten hemi kalha thil an ti anih chuan thuneitute hnenah a rang lama report vat tur a ni.

IOC website in a a tarlan dan atanga chhut hian Gas connection thar dil ta ila kan connection fee chawi tur zat chu hetiang hi a ni ang, entirna chi thum hmangin lo kan chawi tur zat hi tarlang ila. Mipui nawlpui ina kan hman tlanglawn ber kg 14.2 cylinder khi hmangin connection thar lo nei dawn ta ila :

1) Gas stove kha Agent ami kan lei nghal anih a, agency-a keimahni kan document te kenga kan va pan chilh anih chuan hetiang hi kan connection rate tur a ni ang –

1. a) Gas bur 14.2kg security deposit - Rs 2000/-

2. Pressure Regulator - Rs 200/-

3. Hose Pipe 1.5 meter - Rs 190/-

4. Installation charge - Rs 118/-

5. Domestic Card fee - Rs 59/-

Rs 2567+Gas stove price+Gas bur 1 man

2) Gas stove kha Agent ami lei loin hmundang ami kan nei a, Gas connection ti tura Agency-a keimahni kan document te kenga kan va pan chilh anih chuan hetiang hi kan connection rate tur a ni ang –

1. a) Gas bur 14.2kg security deposit - Rs 2000/-

2. Pressure Regulator - Rs 200/-

3. Hose Pipe 1.5 meter - Rs 190/-

4. Installation charge - Rs 118/-

5. Domestic Card fee - Rs 59/-

6. Mechanic visit charge - Rs 236/-

Rs 2803+Gas bur 1 man

3)  Gas connection ti tura Agency hnen atanga hmanrua lei vek a, Agency a keimahni kal lova kan document tul pawh Agency lamin kan chenna ina kal chilh a an rawn lak a, Gas connection pawh keimahni in ngeia min rawn pek a, min fit sak vek anih chuan hetiang hi kan connection rate tur a ni ang –

1. a) Gas bur 14.2kg security deposit - Rs 2000/-

2. Pressure Regulator - Rs 200/-

3. Hose Pipe 1.5 meter - Rs 190/-

4. Installation charge - Rs 118/

5. Visit & Administrative charge - Rs 118/-

6. Collection of equipments - Rs 118/-

7. Domestic Card fee - Rs 59/-

Rs 2803+Gas stove price+Gas bur 1 man


Khimi bakah Kg 10 (composite) leh Kg 5 chi hi connection rate kan hre duh anih chuan point No. 1-a a sub-number atang khian kan connection duh Gas bur a zir zel khan a Security Deposit a hrang zel a, a bak rate hrang hrang khi chu a inang vek a ni. Gas connection rate a Gas bur 1 man tih khi IOC hian Gas man hi a tih danglam reng avangin a chiah sawi a har a, connection kan dil hunlaia Gas man zel kha belh tel tur a ni mai.

Gas stove nei sa tan phei chuan Gas connection thar man hi chuti lua in a sang lo a ni. A sang ni a kan hriat chhan hi kan lei ngei ngei ngai lo, Agency lamin lei ngei ngei tur anga kan connection fee a min belhsak vang mai mai a ni. Chuvang chuan mipui te hian thudik hria ila, kan chanvo hi humhalh ila. Dan kalha kan chanvo min rahbehsak tumtu an awm anih chuan huaisen takin dan hmangin i do let ang u.

Comments

Popular posts from this blog

Volleyball S/F khel dawn