Memory Walk buatsaih a ni

Alzheimer’s & Related Disorders Society of India (ARDSI) Mizoram Chapter chuan nimin khan Alzheimer’s Day pualin Aizawl Chanmari atanga Millennium Centre thleng Memory Walk an buatsaih a, he hun hi Social Welfare Minister Dr. K. Beichhua chuan hmanpuiin Alzheimer chu thluak lam natna, tute pawhin an vei theih, keimahni leh kan chhungkua theuha thleng thei a nih thu a sawi a ni. Alzheimer natna hi Mizo-ram-ah chuan ‘Thluak sawng natna’ tih a ni a, a tihdamna awm lo mah se a veite enkawl danah chhungkua, thenawm khaw vengte leh khawtlang hriatthiamna, enkawl thiamna leh intawiawm tawnna chu thil tul tak a nih avangin a ngaihventu pawl ARDSI hi din a ni a. Mizoram-ah chuan he pawl hi September 21, 2015 khan din niin he pawl hian Alzheimer natna sawihona leh a vei enkawltute zirtirna hun te a buatsaih thin a. A veite leh an dinhmun survey a nei mek a ni.