BDO in Hmeichhe tana Football inelna a hawng

Serchhip District Football Association (SDFA) buatsaih ‘District Women Football Championship 2022’ chu nimin khan Serchhip-ah khelh tan niin Team 7 an tel a ni.
He Football Championship hi Serchhip RD Block-a Block Development Officer Lalrinchhani Ralte chuan nimin chhun khan Serchhip Sports Complex-a Sports Stadium-ah hawngin Hmeichhia te tana Football intihsiakna buatsaih a ni chu lawmawm a tih thu a sawi a. Mizo Hmeichhia te chu an Special hle nia sawiin, eizawnna hmun hrang hrang, sawrkar Pisa chauh ni lovin sumdawnna hmun thlengin hmeichhia tam tak eizawngtu an awm tawh thu leh Serchhip Bazar-ah ngei pawh sumdawng tam zawk chu Hmeichhia an nih tawh thu a sawi a ni. Serchhip BDO chuan kan ramah ruihhlo a tam hle nia sawi a nih thu leh kan khawtlang ah ngei pawh ruihhlo a fihlim lo hmeichhia tam tak an awm nia a lan thu sawiin, hmeichhia te mai bakah thalaite ruihhlo laka kan fihlim a tul thu a sawi a, ruihhlo tih hian tangkaina a neih loh thu leh nun tinuamtu a ni lo tih kan hriat a tul thu a sawi bawk.


He Championship-a tel turte chu nuam ti taka inkhel tura chahin, kan thatlai hun a rei dawn loh avangin nuam ti takin ruihhlo tel lova kan chen a pawimawh thu Serchhip BDO chuan a sawi a, infiamna chi hrang hrangte chu taksa hriselna atan chauh ni lo, rilru hrisel neihna atan pawh a pawimawh em em thu a sawi bawk a ni.

Nimin-a he Championship hawnna hun hi SDFA Hony. Secretary Lalthlamuana Ralte chuan kaihruaiin he Championship-ah hian Team 7 an tel a, an zinga pahnih te hi Serchhip khaw pawn atanga rawn tel niin heng Team 7 te hi Group pahnih-ah then an ni a, Group pakhat-a awm te hi an inkhelh kual hnuah point hmu sang pahnih ten Semi Final an lut anga, karleh Thawhlehni, Sept. 27, 2022 khian Final khela zawhfel tura ruahman a ni.

Comments

Popular posts from this blog

Volleyball S/F khel dawn