Governor in Performance Grading chungchang School Education Department hotute a sawipui

Mizoram Governor Hari Babu Kambhampati chuan Performance Grading Index (PGI) tihchhuah hnuhnung bera Mizoram District thenkhat dinhmun tha lo chungchang leh tanlak ngai lai te nimin khan School Education Department Official te a sawipui.

PGI hi School Education huanga State tinte hmasawnna tarlanna bakah tanlak a tulna lai te chipchiar takin a tehfung hrang hrang nen tarlanna a ni a, nimin-a Governor in hemi chungchang a sawipuina ah hian Secretary School Education Dr. Lalzirmawia Chhangte leh Senior School Education Official te telin Governor Hari Babu Kambhampati zawhna te leh a hriat duh te chu Dr. Lalzirmawia Chhangte hian Power Point presentation hmangin a sawifiah a. Presentation atanga a lan dan chuan PGI 2018-19 ah overall score ah Mamit - 126, Serchhip - 125 leh Lawngtlai - 106 te hmuin an hmu chhe fal hle a. PGI 2019 -20 ah Serchhip leh Lawngtlai te hma an sawn hret a, Mamit a la tha lo hle a, Overall Score-ah 136 chauh a la hmu a ni.

Heng District pathum te hian Mizoram State chu nasa takin PGI ah a hnukhniam tih a hmuh theih a. School Education hotute sawifiah dan chuan heng District 3 te hian a taka an hnathawh thenkhatte report a thehluh loh an nei thin tih hmuh a ni a; tehfung danga an hniamna chhan te pawh tarlan a ni. Heng bakah hian School Education Department in PGI a tanlak an tum dan leh an hmachhawp te chipchiar takin an sawi bawk.

Governor Hari Babu Kambhampati chuan School Education hotute chu School viltu District Level Officer te leh Headmaster te mawhphurhna kenkawh chungchangah zirtirna tha zawka pe turin a chah a. Central sawrkar hmalakna ah leh hmasawnna tehna chi hrang hrangah te report kimchang taka pek leh a hun taka information thehluh tur te thehluh a pawimawh tih a sawi a. PGI chungchang leh Mizoram School Education atana a pawimawh zia te Headmaster leh Headteacher an hriatchian a rin loh thu leh hemi avanga report awm lo thei te a nih theih thu a sawi a. Hemi chungchangah hian District Level-ah School Head te tana a tam thei ang ber zirtirna huaihawt turin School Education hotute chu a fuih bawk a ni.